Nókis qalasında Ózbekstan hám Qaraqalpaqstan futbol associaciyaları, Qaraqalpaqstan Respublikası Mektepke shekemgi hám mektep bilimlendiriwi ministrligi hám tiyisli shólkemlerdiń shólkemlestiriwi menen respublikamızdaǵı ulıwma orta bilim beriw mektepleriniń oqıwshıları arasında «Futbolımız keleshegi seniń qolıńda» súreni astında futbol jarısı ótkerildi.

Jaslar arasında salamat turmıs tárizin úgit-násiyatlaw, olardı futbolǵa keńnen tartıw, qábiletli oqıwshılardı anıqlaw hám olardıń keleshektegi professional rawajlanıwına bekkem tiykar jaratıw maqsetinde ótkerilgen bul jarısqa qalalıq hám rayonlıq basqıshlarda jeńimpaz bolǵan komandalar qatnasıp, jeńimpazlıq ushın óz-ara gúres alıp bardı.
Qızıqlı ótken jarıs juwmaǵında, 1-4-klass oqıwshıları arasında birinshi orındı Xojeli rayonı komandası jeńip alǵan bolsa, sıylı ekinshi hám úshinshi orınlar Moynaq hám Qanlıkól rayonları komandalarına nesip etti.
5-8-klass oqıwshıları arasında ótkerilgen jarısta bolsa, Shımbay rayonı komandası bas sıylıqtı jeńip aldı. Gúmis hám qola medalların bolsa, Moynaq hám Nókis rayonları jasları jeńip alıp aldı.
– Mektebimiz oqıwshıları sporttıń milliy gúres, boks, shaxmat-shashka, futbol, jeńil atletika túrleri boyınsha turaqlı túrde shuǵıllanıp, rayon hám respublika kóleminde ótkerilip kiyatırǵan jarıslarda jeńimpazlıqtı qolǵa kirgizip kelmekte, – deydi Shımbay rayonındaǵı 17-sanlı mektep direktorınıń orınbasarı Sultanbay Abdullaev. – Atap aytqanda, milliy gúres boyınsha 2010-2011-jılları tuwılǵan oqıwshılar arasında ótkerilgen Qaraqalpaqstan chempionatında Gúlziyba Baltabaeva hám Diydar Baltabaevlar altın, Begzat Keńesbaev hám Beknazar Biysenbaevlar qola medalların jeńip alıp, 4-7-noyabr kúnleri Xorezm wálayatında ótkeriletuǵın Ózbekstan chempionatına qatnasıw jollamasına iye boldı. Al, búgin bolsa, denetárbiya muǵallimi Alpısbay Dáwekeev tayarlaǵan oqıwshılarımız Qaraqalpaqstanda birinshi orındı jeńip almaqta. Bul mektebimiz jámáátin úlken quwanıshqa bóledi. Bunıń ushın komandamız treneri hám oqıwshılarǵa úlken raxmet aytaman. Aldaǵı waqıtları bul oqıwshılar arasınan elimizge belgili sportshılar ósip jetilisetuǵınına bekkem isenemen.
Ótkerilgen jarıs sońında jeńimpaz komandalar shólkemlestiriwshiler tárepinen tayarlanǵan arnawlı diplom, medal, kubok hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.