Nókis rayonındaǵı «Úlgili mákan» mákan puqaralar jıyını sońǵı jılları payda bolǵan elat bolıp, bul jerde kóplegen jańa úlgidegi úylerdiń salınıwı menen jıldan-jılǵa xalıq sanı kóbeyip barmaqta.

Xalqımız arasında salamat turmıs tárizin keńnen en jaydırıw hám ósip kiyatırǵan jas áwladtıń sport penen shuǵıllanıwına qolaylı sharayatlar jaratıp beriw maqsetinde, usı elatta 2022-jılı «GULAIM JUDO CLUB» dzyudo klubı óz jumısın baslaǵan edi.
Bul sport klubında házirgi kúnleri 150 ge shamalas jas sportshılar pútkil elimizge belgili palwanlardan Ernazar Sarsenbaev, Gúlayım hám Perida Jumabaevalardıń qol astında shuǵıllanıp atır. Sport klubına tek ǵana usı aymaqtan emes, al, qońsılas aymaqlardan dzyudoǵa kızıǵıwshı jas sportshılar qatnasıp, aymaq jasları respublikamız kóleminde ótkerilgen kóplegen sport jarıslarda jeńimpazlıqtı qolǵa kirgizip kelmekte.
Atap aytqanda, sport klubınıń tárbiyalanıwshılarınan Nurislam Mirzaliev, Atabek Muxashev, Alpamıs Niyetbaev , Shaxsanem Espolova, Nargiza Abatbaevalar Qaraqalpaqstan hám Ózbekstan kólemindegi jarıslarda sıylı orınlardı iyelewge miyasar boldı.
Aymaq jaslarınıń dzyudoǵa degen qızıǵıwshılıǵın inabatqa alıp, olardıń bul sport túri menen shuǵıllanıwına ele de qolaylı sharayatlar jaratıp beriw maqsetinde, klub shólkemlestiriwshileri «28-oktyabr – Xalıqaralıq dzyudo kuni» múnásibeti menen «GULAIM JUDO CLUB» klubınıń 2-sport zalın ashıwǵa eristi.
«28-oktyabr – Xalıqaralıq dzyudo kúni» múnásibeti menen klubtıń ekinshi qosımsha sport zalınıń ashılıw máresimi ótkerilip, oǵan aymaq turǵınları, sport veteranları hám jaslar qatnastı.
Onda Qaraqalpaqstan Respublikası sport ministri Erkinbay Qutıbaev hám basqalar ilaj qatnasıwshıların jańa sport zaldıń ashılıwı menen qutlıqlap, sońǵı jılları elimizde húrmetli Prezidentimiz Sh.Mirziyoev basshılıǵında jaslardıń sport penen shuǵıllanıwına keń imkaniyatlar jaratılǵanın, bunıń nátiyjesinde mámleketimiz sportshıları xalıqaralıq jarıslarda úlken tabıslardı qolǵa kirgizip atırǵanın aytıp ótti hám bul sport klubınan da keleshekte pútkil dúnyaǵa belgili Olimpiada chempionları ósip jetilisiwine tilekleslik bildirdi.
“GULAIM JUDO CLUB” tiykarın salıwshı Gúlayım Jumabaeva hám onıń inisi Ernazar Sarsenbaevlar dzyudo boyınsha ótkerilgen jáhán kuboginiń sıylı orın iyeleri, ájapası Perida Jumabaeva hám sińlisi Indira Jumabaevalar Aziya chempionatınıń sıylı orın iyeleri bolıp esaplanadı.
– Men usı aymaqta jaylasqan 19-sanlı ulıwma bilim beriw mektebiniń 7-klass okıwshısıman, – deydi klub tárbiyalanıwshılarınan biri Atabek Muxashev. – Dzyudo menen 2 jıldan berli trenerim Gúlayım Jumabaevanıń qol astında shuǵıllanıp kiyatırman. Usı kúnge shekem Qaraqalpaqstan chempionatında bir neshe márte jeńimpaz hám Ózbekstan kóleminde ótken jarıslarda sıylı orınlardı iyeledim. Sport klubımızda sportshılardıń gúres penen shuǵıllanıwı ushın barlıq qolaylıqlar jaratılǵan. Bunıń ushın klub basshılarına úlken raxmet aytaman.
Saltanatlı máresimde imarat aldına tartılǵan dástúriy lenta kesilip, qatnasıwshılar sport zaldaǵı sharayatlar menen jaqınnan tanıstı.

Adilbay Orazov,
Qaraqalpaqstan xabar agentligi sholıwshısı.