Tiyisli taraw hám uyımlarǵa, deputatlarǵa rawajlanıw strategiyası hám mámleketlik baǵdarlamalardıń sapalı orınlawın sistemalı monitoring etip barıw wazıypaları belgilengen bolıp, orınlarda taraw basshılarınıń esap beriw májilisleri bolıp ótpekte.

Xalıq deputatları Moynaq rayonlıq Keńesindegi ÓzLiDeP deputatlıq toparınıń gezektegi esabat tıńlaw májilisi bolıp ótip, onda partiya deputatlıq toparınıń aǵzaları, rayonlıq salıq inspekciyasınıń basshıları, tiyisli shólkemler hám jergilikli isbilermenler qatnastı.
Májilis kún tártibine muwapıq, Moynaq rayonı salıq inspekciyası bólimi baslıǵınıń 2025-jıldıń 9 ay dawamında ámelge asırılǵan jumıslar hám isbilermenlikti qollap-quwatlaw boyınsha esabatı tıńlandı.
Usınılǵan esabat maǵlıwmatlarına muwapıq, 2025-jıldıń 9 ayında rayon boyınsha byudjetke jámi 3 milliard 624 million sum reje belgilengen bolıp, tiykarınan 3 milliard 859 million sum túsim támiyinlendi. Bul kórsetkish rejeniń 106 procent orınlanǵanın ańlatadı.
– Sonday-aq, ІІІ sherekte reje 1 milliard 222 million sumdı quraǵan bolsa, ámeliy túsim 1 milliard 257 million sumdı quradı hám reje 103 procentke orınlandı, – deydi ÓzLiDeP Qaraqalpaqstan Respublikası Keńesiniń bólim baslıǵı A.Esemuratova.
Ótken jıldıń usı dáwirine salıstırǵanda byudjet túsimleri 106 procentke ósken bolsa da, ayırım salıq túrleri boyınsha orınlaw dárejelerinde ayırmashılıqlar baqlandı. Sonıń ishinde, aylanıstan alınatuǵın salıq rejesine salıstırǵanda 80 procent, fizikalıq táreplerdiń dáramat salıǵı 64 procent, yuridikalıq táreplerdiń jer salıǵı 43 procent, múlk salıǵı 98 procent, suw salıǵı 99 procent jáne puqaralardan óndiriletuǵın jer hám múlk salıqları 200 procent orınlanǵanı málim etildi.
Bunnan tısqarı, kárxanalardıń byudjet aldındaǵı qarızdarlıǵı 2025-jıl 1-oktyabr jaǵdayına 323 million sumdı quraǵan bolıp, jıl basına salıstırǵanda 5,5 procentke azayǵanı atap ótildi. Esap beriw dáwirinde rayonda 104 yuridikalıq mikrofirma hám kishi kárxana, 162 jeke tártiptegi isbilermen hám 1700 ózin-ózi bánt etken puqara dizimnen ótkeni atap ótildi. Bul kórsetkishler rayonda isbilermenlik potencialınıń artıp baratırǵanın kórsetedi.
Deputatlıq tıńlawda deputatlar esabat nátiyjelerin talqılap, ayırım salıq túrleri boyınsha orınlaw dárejesiniń tómen ekenligi, atap aytqanda, aylanıstan alınatuǵın salıq hám fizikalıq táreplerden alınatuǵın dáramat salıǵı boyınsha kórsetkishler jeterli dárejede támiyinlenbegenin atap ótip, bul tarawda sistemalı kemshilikler bar ekenligin sınǵa aldı. Sonıń menen birge, isbilermenlikti qollap-quwatlaw, salıq tólewshiler ushın qolaylı sharayat jaratıw, profilaktikalıq jumıslardı kúsheytiw hám salıq hákimshiligin sanlastırıw arqalı bul kórsetkishlerdi jaqsılaw boyınsha usınıslar alǵa qoyıldı.
Májiliste deputatlıq topar tárepinen salıq uyımları jumıslarınıń nátiyjeliligin arttırıw, isbilermenlerdiń huqıqları menen máplerin qorǵaw hám aymaqlıq byudjet turaqlılıǵın támiyinlew boyınsha anıq usınıslar berildi.
Partiyanıń Moynaq rayonlıq Keńesindegi deputatlıq toparı usı máseleler boyınsha tiyisli shólkemler menen birgelikte turaqlı deputatlıq qadaǵalawdı ámelge asırıwı belgilendi.

Qaraqalpaqstan xabar agentligi