Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan hám Qaraqalpaqstan Respublikalarına xızmet kórsetken artist Baltaniyaz Qaypovtıń tuwılǵanınıń 80 jıllıǵına baǵıshlanǵan ruwxıy-aǵartıwshılıq ilaj bolıp ótti.

Onda jazıwshı-shayırlar, kórkem óner ǵayratkerleri, nuranıylar, teatr hám kórkem óner ıqlasbentleri, ǵalaba xabar qurallarınıń wákilleri qatnastı.
Keshede Qaraqalpaqstan Respublikası Mádeniyat ministri B.Temirbaev, Berdaq atındaǵı Qaraqalpaq mámleketlik akademiyalıq muzıkalı teatrı jámááti hám basqalar saxna pidayısı B.Qaypovtı 80 jıllıǵı menen qutlıqladı.
Atap ótilgenindey, B.Kaypov qaraqalpaq saxnasında ólmes obrazlar dóretti. Xalqımız onı komik aktyor sıpatında biledi hám húrmet etedi. Biraq onı keń diapazonǵa iye aktyor desek boladı. Sebebi, ol barlıq janrlarda, hár qıylı xarakterdegi insanlardıń obrazların ashıp bere aldı. Dramalıq obrazlardı da sheberlik penen atqardı. Tınımsız miynetleri izleniwleri arqasında saxnada birin biri tákirarla-maytuǵın, hár qıylı janrda 50 den aslam rán-báreń obrazlar dóretip tamashagóylerdiń kewlinen shıqtı.
Qutlıqlawlarda T.Qayıpbergenovtıń «Qaraqalpaq qızı» tiykarında jazılǵan «Jumagúl» dramasında Turımbet, «Axmaq patsha»da Aydar, «Baxıtlı bolıń balalarım»da Sarıbek, «Ay tutılǵan túnde»de Diywana, «O dúnyaǵa mirát»te Mamont, «Súymegenge súykenbe» de Oralbay, «Ójet» te Xalmurat, «Gúńelek qız hám táwip»te Sganarel, «Máńgi bulaq»ta Ptomeley, «Qatınımdı qaytıp ber»de Kazbek, «Sawǵa»da Shontıq shayır sıyaqlı jaratqan obrazları tamashagóylerdiń júreginen tereń orın iyelegeni ayrıqsha atap ótildi. Qaraqalpaq mámleketlik Jas tamashagóyler teatrında qoyılǵan spektakllerden «Eglengen báhár» de Sabır, «Yaratqannıń dálkegi»nde Yaratqan, «Toǵız tońqıldaq bir shińkildek»de Doщım, «Jalańash korol»de wáziyr, «Nókis qorǵanı»nda Sokolov rolleri xalqımızdıń esinde.
«Qaraqalpaqfilm» kinostudiyasında súwretke alınǵan «Saqıy bala», «Kurort», «Urı», «Esщan baqsı» hám basqa da filmlerde, sonday-aq «Shańaraq» serialında roller atqardı. Kórkem filmlerde roller atqarıw menen birge, qaraqalpaq dublyajınıń rawajlanıwına da úles qostı. Qaraqalpaqstan radiosında beriletuǵın «Tikenek» satiralıq jurnalınıń hár sanında hám televideniede teleminatyuralarda qatnastı.
Ol Tashkent, Almata, Ashxabad qalalarında, Bashqurtstan, Tatarstan, Dagestan Respublikalarında ótkerilgen Qaraqalpaqstan ádebiyatı hám mádeniyatı kúnleriniń hám Xalıqaralıq teatrlar festivallarınıń qatnasıwshısı.
Saxna pidayısı, xalıqtıń súyikli kórkem óner ǵayratkeri B.Qaypovtıń derlik yarım ásirlik dóretiwshilik miyneti ılayıqlı bahalandı. Ol «Qaraqalpaqstan Respublikasına xızmet kórsetken artist», «Ózbekstan Respublikasına xızmet kórsetken artist» húrmetli ataqları menen sıylıqlanadı.
Keshede Baltaniyaz Qaypov rol atqarǵan kinofilm hám pesalardan úzindiler kórsetilip, ilaj xalqımızǵa belgili kórkem óner ǵayratkerleri qatnasıwında koncert baǵdarlaması menen dawam etti.

Qaraqalpaqstan xabar agentligi.