Usı jıldıń 14–19-oktyabr kúnleri aralıǵında Qazaqstan Respublikasınıń Atıraw qalasında Kaspiy boyı mámleketleri universitetleri hám ilimiy-izertlew orayları associaciyasınıń XXVII Bas assambleyası hám X.Dosmuxammedov atındaǵı Atıraw universitetiniń 85 jıllıǵına arnalǵan “Xalel oqıwları-2025: Zamanagóy ilim hám bilimlendiriwdiń rawajlanıw tendenciyaları” atamasındaǵı xalıqaralıq ilimiy-teoriyalıq konferenciya bolıp ótti.

Bul ilimiy ánjumanǵa Berdaq atındaǵı Qaraqalpaq mámleketlik universitetiniń Qaraqalpaq filologiyası hám jurnalistika fakulteti dekanı, Qaraqalpaq ádebiyatı kafedrası professorı, filologiya ilimleriniń doktorı Qonaqbay Turdıbaev «Kaspiy ekosisteması: ilim hám bilimlendiriw integraciyası» temasındaǵı Kaspiy boyı mámleketleri mámleketlik universitetleri associaciyasınıń XXVII Bas Assambleyasınıń plenar májilisi hám panel sessiyalarında “Ózbekstan hám Qazaqstan bilimlendiriw sistemasındaǵı óz-ara múnásibetler: tájiriybeler hám perspektivalar” temasındaǵı bayanatı menen qatnasıp, Xalel Dosmuxamedov atındaǵı Atıraw universitetiniń 85 jıllıǵı menen Qaraqalpaq mámleketlik universiteti tárepinen tayarlanǵan qutlıqlawı hám estelik sawǵaların tapsırdı.
Sonday-aq, X.Dosmuxamedov atındaǵı Atıraw universitetiniń Basqarma baslıǵı-rektor Salamat Idrisov penen ushırasıw ótkerilip, onda keleshekte birgeliktegi ilimiy konferenciyalar, seminarlar hám dóretiwshilik joybarlardı shólkemlestiriwge kelisip alındı.
Bunnan tısqarı, sapar sheńberinde professor Q.Turdıbaev Qazaqstan Respublikasınıń Aqtaw qalasındaǵı Sh. Esenov universitetinde de bolıp, bul jerde professor-oqıtıwshıları menen sáwbetlesiwler alıp bardı. Sonday-aq, universitettiń materiallıq-texnikalıq bazası, auditoriyalar menen támiyinleniwi, oqıtıwshılar hám studentlerge jaratılǵan sharayatlar, oqıw procesiniń shólkemlestiriw jaǵdayları menen jaqınnan tanıstı. Sapar dawamında, usı xalıqaralıq birge islesiwler nátiyjesinde professor Q.Turdıbaev “Xalel Dosmuxamedov atındaǵı Atıraw universitetine 85 jıl” kókirek belgisi menen sıylıqlandı.

Adilbay Orazov,
Qaraqalpaqstan xabar agentligi sholıwshısı