Ózbekstan Xalıq demokratiyalıq partiyası Qaraqalpaqstan Respublikası Keńesi tárepinen “Biz birgemiz!” joybarı sheńberinde I.V.Savickiy atındaǵı mámleketlik kórkem óner muzeyine fizikalıq imkaniyatı sheklengen shaxslar ushın mádeniy sayaxat shólkemlestirildi.

Partiya elektoratı wákilleri menen ótkerilgen sóylesiwde Ózbekstan Xalıq demokratiyalıq partiyası Qaraqalpaqstan Respublikası Keńesiniń baslıǵı, Qaraqalpaqstan Respublikası Joqarǵı Keńesindegi ÓzXDP frakciyasınıń basshısı Xalilla Eshimbetov, I.V.Savickiy atındaǵı Qaraqalpaqstan mámleketlik kórkem óner muzeyiniń ilimiy xatkeri, partiyanıń baslanǵısh shólkeminiń baslıǵı Biybisara Yusupova hám Ózbekstan Mayıplar jámiyeti Qaraqalpaqstan Respublikası aymaqlıq bóliminiń baslıǵı Parshagúl Dáwletiyarovalar shıǵıp sóyledi. Shıǵıp sóylegenler partiya baslamalarına toqtap, fizikalıq imkaniyatı sheklengen shaxslar ushın jaratılıp atırǵan imkaniyatlar tek ǵana olardıń turmıs sapasın arttırıw emes, al, jámiyette teń huqıqlı ortalıqtı qáliplestiriwge xızmet etip atırǵanın atap ótti.
Ilaj dawamında qatnasıwshılarǵa “I.V.Savickiy atındaǵı Qaraqalpaqstan mámleketlik kórkem óner muzeyi tariyxı”na baǵıshlanǵan hújjetli film kórsetildi. Film arqalı olar muzey jumısınıń tariyxı hám mámlekettiń mádeniy turmısındaǵı ornı menen jaqınnan tanısıw imkaniyatına iye boldı.
Sonday-aq, qatnasıwshılar “Savickiy dúnyası” atamasındaǵı kórgizbe menen tanıstı. Kórgizbede kórsetilgen eksponatlar hám kórkem shıǵarmalar qatnasıwshılar ushın estetikalıq zawıq hám ruwxıy ilham deregi boldı.
– Bul joybardıń tiykarǵı maqseti, fizikalıq imkaniyatı sheklengen shaxslardıń jámiyette belsene qatnasıwın támiyinlew, olardı sociallıq turmısqa integraciyalaw jáne ózlerin múnásip hám teń huqıqlı jámiyet aǵzası sıpatında seziniwi ushın sharayat jaratıwdan ibarat, – Ózbekstan Xalıq demokratiyalıq partiyası Qaraqalpaqstan Respublikası Keńesiniń bólim baslıǵı Nurlan Kıshanov. – Sonı ayrıqsha atap ótiwimiz kerek, joybar Ózbekstan Mayıplar jámiyeti Qaraqalpaqstan Respublikası aymaqlıq bólimi, Ózbekstan Gereńler jámiyeti Qaraqalpaqstan Respublikası aymaqlıq bólimi hám bir qatar juwapker shólkemler menen birgelikte ámelge asırılmaqta.
“Biz birgemiz!” joybarı jámiyette insanıylıq, miyrim-shápáát hám awızbirshilik ideyaların bekkemlew, sonıń menen birge puqaralardıń mádeniy turmısta teńdey qatnasıw huqıqın támiyinlew jolındaǵı áhmiyetli qádem bolıp esaplanadı.

Qaraqalpaqstan xabar agentligi