Nókis qalası 10-sanlı “Nurlı mákan” mektep internatında kózi ázzi hám shala kóriwshiler arasında sporttıń 5×5 futbol túrinen Ózbekstan chempionatı bolıp ótti.

CHempionatqa elimizdiń barlıq aymaqlarınan komandalar qatnasıp, jeńimpazlıq ushın óz-ara gúres alıp bardı.
Qızǵın bellesiwler tolı bolǵan jarısta, respublikamızdıń saylandı komandası Qashqadárya, Surxandárya hám Nawayı wálayatı komandaların jeńip, finalǵa shıǵıwǵa eristi.
Kópshilik futbol jankúyerleri kútkenindey, Tashkent qalası komandası menen ótken final oyını oǵada qızıqlı ótip, ushırasıwdıń tiykarǵı waqtında jeńimpaz anıqlanbadı hám penaltiler seriyasına náwbet berildi.
Bunda áwmet tashkentli futbolshılarǵa kúlip baǵıp, olar Ózbekstan chempionı ataǵına miyasar boldı.
Timur Qıdırbaev basqarǵan respublikamız komandası ekinshi, Nawayı wálayatı futbolshıları úshinshi orındı jeńip alıwǵa miyasar boldı.
– Ótken jılı finalda Nawayı komandasın jeńip, chempion bolǵan edik,-deydi respublikamız saylandı komandası treneri Timur Qıdırbaev. – Bıyıl komandamızǵa azmaz áwmet jetispedi. Sonlıqtan gúmis medal menen shekleniwge májbúr boldıq. Sportta usınday waqıyalar da bolıp turadı. Endi komandamız aǵzaların aldaǵı jarıslarǵa tayarlay beremiz.
Jarıs sońında jeńimpazları shólkemlestiriwshiler tárepinen diplom, medal hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.