Ózbekstanda Shanxay birge islesiw shólkemi Xalıq diplomatiyası orayınıń direktorı Qobiljon Sobirov Stambul qalasına saparı sheńberinde Túrkiyadaǵı Ózbekstan mádeniyatı, tilekleslik hám birge islesiw jámiyetiniń baslıǵı CHwqay Kwchar hám qala hákimligi Xalıqaralıq baylanıslar departamentiniń basshısı Barbaros Buyuk Sagnak penen ushırasıw ótkerdi.

Sóylesiw waqtında eki tuwısqan eldiń mádeniy birge islesiwin bunnan bılay da rawajlandırıw, dos qalalarımızdıń potencialınan nátiyjeli paydalanıw, mádeniy almasıw baǵdarlamaların keńeytiw hám xalıqlar arasındaǵı doslıq qatnasıǵın bekkemlew máseleleri dodalandı.
Q.Sobirov miymanlarǵa ShBSh Xalıq diplomatiyası orayı, atap aytqanda, ámelge asırılıp atırǵan xalıqaralıq mádeniy-aǵartıwshılıq joybarlar haqqında tolıq maǵlıwmat berdi.
Óz gezeginde, Barbaros Buyuk Sagnak Oraydıń jumısın joqarı bahalap, keleshekte bar óz-ara baylanıslardı rawajlandırıwǵa qaratılǵan birgeliktegi baslamalardı ámelge asırıwǵa tayar ekenin atap ótti.
Dodalaw sońında Túrkiyadaǵı túrles juwapker shólkemler menen tek ǵana mádeniy emes, al ilimiy tarawda birge islesiw kólemin keńeytiw, sonıń ishinde, túrkiy mámleketlerdiń naqıl-maqallarınan ibarat kitap basıp shıǵarıw, jas ilimpazlardıń ilimiy izlenislerin toplam sıpatında basıp shıǵarıw, sonday-aq, aqıl orayları (think tank) arasında birge islesiwdi kúsheytiw sıyaqlı jedel baslamalar alǵa qoyıldı.
Ilaj doslıq hám qızǵınlıq ruwxında ótti. Tárepler keleshektegi birge islesiwge baylanıslı áhmiyetli baǵdarlardı belgilep alıp, ámeliy birge islesiwdi jáne de tereńlestiriwge kelisip aldı.
Ushırasıwda Yunus Rajabiy atındaǵı Ózbek milliy muzıka kórkem óneri institutınıń rektorı Eldor Shermanov ta qatnastı.

Ǵ.Xonnazarov, ÓzA
Ózbekstanda ShBSh Xalıq diplomatiyası orayı baspasóz xızmeti menen birgelikte tayarlandı.