Baxreynde dawam etip atırǵan jaslar arasındaǵı III Aziya oyınlarınıń 23-oktyabr kúngi bellesiwlerinde 15 sport túri boyınsha bellesiwler ótkeriledi.

Onda Ózbekstan delegaciyası sportshıları 3×3 basketbol, jeńil atletika, boks, futzal, MMA, muaytay, at sportı, triatlon hám voleybol sport túrleri boyınsha jarıs jeńimpazlıǵı ushın gúresedi.
Esletip ótemiz, bul jarısta Ózbekstan sport delegaciyası 5 altın, 1 qola medalı menen ulıwma komandalıq esapta jetekshilik etpekte. Indoneziya delegaciyaları 1 altın hám gúmis medal menen ekinshi, Filippin bolsa 1 altın menen kúshli úshlikten orın aldı.
Maǵlıwmat ornında: 22-oktyabr kúni III Aziya oyınlarınıń saltanatlı ashılıw máresimi bolıp ótti. Bul máresimde Ózbekstan delegaciyasınıń basshıları hám aǵzaları da qatnastı.
Baxreyn mámleketinde ótip atırǵan oyınlar sheńberinde Aziya Olimpiya keńesi Atqarıw komitetiniń 101-májilisi joqarı dárejede hám nátiyjeli túrde ótkerildi. Májiliste sport tarawın rawajlandırıw, olimpiada háreketin jáne de keńeytiw hám region elleri arasındaǵı birge islesiwdi kúsheytiwge baylanıslı bir qatar máseleler kórip shıǵıldı.
Sonday-aq, Ózbekstan Respublikası sport ministri Adham Ikromov hám Milliy olimpiada komiteti basshılıǵı Aziya Olimpiada keńesi hám Afrika Milliy olimpiada komitetleri associaciyası wákilleriniń qatnasıwında ushırasıw shólkemlestirildi.
Onda sport hám olimpiada háreketi arqalı Aziya hám Afrika regionları arasında doslıq baylanısların jáne de bekkemlew, sonday-aq, eki tárepleme birge islesiwdi jańa basqıshqa alıp shıǵıw máseleleri dodalandı.

Javohir Toshxwjaev, ÓzA