Qaraqalpaqstan Respublikasına rásmiy saparı sheńberinde Germaniya Bundestagınıń Awıl xojalıǵı hám watan máseleleri komitetiniń baslıǵı, mırza Hermann Ferber basshılıǵındaǵı delegaciya Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi janındaǵı Aralboyı xalıqaralıq innovaciya orayında boldı.

Bundestag deputatları Kristof Frauenprays, Shteffen Yanix, Ina Latendorf hám Vinfri Xolstan ibarat delegaciyaǵa Germaniya xalıqaralıq birge islesiw jámiyeti (GIZ) niń Qaraqalpaqstandaǵı wákilleri basshılıq etti.
Sapardan gózlengen maqset – oraydıń jumısı hám Aralboyı regionında turaqlı rawajlanıwdı qollap-quwatlaw, awıl xojalıǵı nátiyjeliligin arttırıw hám innovaciyalıq ekologiyalıq sheshimlerdi engiziwge qaratılǵan GIZ benen birgelikte ámelge asırılıp atırǵan joybarlar menen tanısıw.
Delegaciyanıń saparı sheńberinde oraydıń ilimiy-izertlew hám joybarlar prezentaciyası ótkerildi. Sonday-aq, Aralboyı regionında ekosistemalardı tiklew hám xalıqtıń turmıs sharayatların jaqsılawǵa qaratılǵan joybarlar haqqında maǵlıwmat berildi. Delegaciya aǵzaları Aralboyı ekosistemaların tiklew hám awıl xojalıǵın ózgeriwsheń klimatqa beyimlestiriw boyınsha innovaciyalıq texnologiyalar islep shıǵılıp hám sınaqtan ótkerilip atırǵan ilimiy-óndirislik uchastkasında alıp barılıp atırǵan tájiriybeler menen de tanıstı.
Mámleketimiz basshısı Shavkat Mirziyoevtiń baslaması menen Aralboyı aymaǵında ekologiyalıq turaqlılıqtı tiklew hám xalıqtıń turmıs sharayatın jaqsılawǵa qaratılǵan keń kólemli ilajlar miymanlarda úlken tásir qaldırdı. Delegaciya aǵzaları ekologiyalıq krizis aqıbetlerine qarsı gúresiw hám aymaqtı turaqlı rawajlandırıw ushın jańa imkaniyatlar jaratıw boyınsha ámelge asırılıp atırǵan baǵdarlamalardıń áhmiyetin ayrıqsha atap ótti.
Sapar juwmaǵında tárepler ilim, ekologiya hám agrotexnologiyalar tarawındaǵı birge islesiwdi bunnan bılay da rawajlandırıw perspektivaları boyınsha pikir alıstı, Ózbekstan hám Germaniya arasındaǵı sheriklik qatnasıqların rawajlandırıwdan óz-ara mápdar ekenligin bildirdi.

Qaraqalpaqstan xabar agentligi.