Mámleketimizde sport tarawı hám ózbek tiliniń rawajlanıwı jolında jáne bir áhmiyetli qádem taslandı – birinshi márte “Ózbek tilindegi sport atamalarınıń túsindirme sózligi” basıp shıǵarıldı. Sózlik Ózbekstan Respublikası Sport ministrligi, Ózbekstan Ilimler akademiyası Ózbek tili, ádebiyatı hám folklorı institutı hám Jurnalistika hám ǵalaba kommunikaciyalar universiteti menen birgelikte tayarlanǵan.

Sózlikte Ózbekstanda ǵalaba en jayǵan 20 ǵa shamalas sport túrine baylanıslı mıńlaǵan atamalar ilimiy tiykarda túsindirilgen. Sonıń ishinde, futbol, shaxmat, boks, taekvondo, karate, kórkem gimnastika, qılıshlasıw, jeńil hám awır atletika, at sportı sıyaqlı tarawlar qamtıp alınǵan.
Bul sózlik ózbek tilinde sport terminleriniń sistemalastırılǵan, ilimiy tiykarlanǵan hám anıq túsindirilgen birinshi tolıq baspası bolıp esaplanatuǵının atap ótiw kerek. Onda tek ǵana sport emes, al sport tariyxına baylanıslı atamalar, sport inventarları, federaciya hám shólkemlerdiń atamaları da qamtıp alınǵan.
Bul sózliktiń jaratılıwı Prezidentimizdiń 2020-jıl 20-oktyabrdegi “Mámleketimizde ózbek tilin bunnan bılay da rawajlandırıw hám til siyasatın jetilistiriw ilajları haqqında”ǵı pármanında belgilep berilgen wazıypalardıń orınlanıwınıń ámeliy kórinisi boldı, desek asıra aytqan bolmaymız. Sonday-aq, 2022-jıl 3-noyabrde qabıl etilgen “Dene tárbiyası hám sport tarawında kadrlardı tayarlaw hám ilimiy izertlewler sistemasın bunnan bılay da jetilistiriw ilajları haqqında”ǵı Prezident pármanı talapları tiykarında sport tarawında lingvistikalıq málimleme bazasın qáliplestiriwde úlken áhmiyetke iye.
– Bul sózlik sport qánigeleri, Denetárbiya hám sport universiteti studentleri, sport jurnalistleri, tiltanıwshı ilimpazlar, doktorant hám magistrler, sonday-aq, sport terminleri menen islesetuǵın barlıq ushın bahalı qollanba bolıp xızmet etedi, – deydi filologiya ilimleri boyınsha filosofiya doktorı Muxlisa Sobirova. – Sózliktiń baspa basılımı menen bir qatarda onıń zamanagóy sanlı formaları da jaratıldı. Paydalanıwshılar ushın www.sportatamaları.uz veb-saytı hám “Sport atamaları” atlı mobil qosımsha islep shıǵılıp, internet tarmaǵına jaylastırıldı.
Joybarǵa filologiya hám sport tarawınıń jetekshi qánigeleri tartılǵan bolıp, joybar basshısı Muxlisa Sobirova, redakciya kollegiyası Durdona Xudoyberganova, Yulduz Ortiqova, Muyassar Saparniyazova, Durdona Lutfullaeva, Manuchehr Ibragimov, Feruza Manukyan, Nafisa Mwminova hám Aziza Ahmedovadan ibarat.

Lola Toshtemirova, ÓzA