Mámleketimizge kelgen sırt mámleketlerdiń wákilleri, xalıqaralıq shólkemlerdiń juwapkerleri ushın paytaxtımızda qurılǵan Olimpiada qalashası menen tanısıw dástúrge aylandı.

Qısqa waqıtta qurılıp, óz jumısın baslaǵan 100 gektardan aslam maydandı qamtıp alǵan sportshılar dárgayında búgingi kúnde hár qıylı sport túrleri boyınsha oqıw-shınıǵıwlar, xalıqaralıq jarıslar, doslıq ushırasıwları, birinshilikler sistemalı túrde shólkemlestirilmekte.
Kúni keshe elimizge kelgen dúnyadaǵı abıraylı joqarı bilimlendiriw mákemelerinen biri Vestminster universitetiniń prezidenti, professor Piter Bonfild Olimpiya qalashasındaǵı “Velodrom”, “Oraylıq oyın maydanı”, “Suw sportı”, “Jámiyetlik sport túrleri” hám “Jeke gúres sport túrleri” imaratları hám olarda jaratılǵan sharayatlar menen tanıstı. Ózbekstan Olimpiada oyınları dárejesindegi abıraylı kompleksli sport oyınların qabıl ete alatuǵın qúdiretke iye mámleket dárejesine kóterilip atırǵanın atap ótti.
Sport ministriniń orınbasarı Sh.Mahmudov, Milliy olimpiada komitetiniń bas xatkeri O.Qosimov, Tashkent qalasındaǵı xalıqaralıq Vestminster universitetiniń rektorı K.Karimov hám sırt el delegaciyası wákilleriniń qatnasıwında ótkerilgen ushırasıwda elimizde sport tarawında ámelge asırılıp atırǵan reformalar, erisilip atırǵan nátiyjeler, sport bilimlendiriwi baǵdarındaǵı keń kólemli jumıslar haqqında maǵlıwmatlar berip ótildi.
Doslıq ruwxında ótken sóylesiw procesinde birge islesiw baylanısların bekkemlew, jańasha joybarlar boyınsha kóp táreplemeli qatnasıqlarda izbe-izlikke erisiw boyınsha usınıslar alǵa qoyıldı.

T.Rwziev, ÓzA