Milliy kinologiya orayında jaqında “Eslew kompleksi” paydalanıwǵa tapsırıldı.

Komplekstiń ashılıw máresiminde Bajıxana komitetiniń basshıları, oraydıń shólkemlestiriliwine úles qosqan veteranlar, jeke quram hám qaytıs bolǵan kinologlardıń shańaraq aǵzaları qatnastı.
Ilajda Bajıxana komitetiniń baslıǵı A.Mavlonov shıǵıp sóylep, sońǵı jılları Prezidentimiz tárepinen Bajıxana sistemasına kórsetilip atırǵan joqarı itibardıń nátiyjesinde Milliy kinologiya orayında da keń kólemli qurılıs hám sistemalı jańalanıw jumısları ámelge asırılıp atırǵanın atap ótti.

Jáhán Bajıxana shólkeminiń regionallıq statusına iye bul orayda sońǵı úsh jıl dawamında Bajıxana uyımlarınıń 460, huqıq qorǵaw uyımlarınıń 210, sonday-aq, sırt mámleketlerdiń 50 kinologi bilim aldı.
Házirgi waqıtta oray Túrkiya, Qubla Koreya, Ázerbayjan, Qazaqstan, Latviya, Litva, Ullı Britaniya hám Rossiya Bajıxana uyımlarınıń kinologiya xızmetleri menen tıǵız birge islesiwdi jolǵa qoyǵan.

Maǵlıwmat ornında aytıw kerek, Bajıxana uyımlarında xızmet iytleriniń járdeminde 2023-2024-jıllar hám usı jıldıń ótken toǵız ayında 10 tonnadan aslam náshebentlik quralları hám 44 kilogramm kúshli tásir etetuǵın elementlerdiń nızamsız aylanısına shek qoyıldı.
Bul nátiyjelerge erisiwde Milliy kinologiya orayınıń jumısı menen bir qatarda, marhum kinologlardıń da múnásip úlesi bar. Sonıń ushın oraydıń háwlisinde boy tiklegen “Eslew kompleksi” olardıń esteligin máńgilestiriw hám húrmet penen eslew jolındaǵı áhmiyetli qádem boldı.
Máresimde simvolikalıq lenta kesilip, kompleks ashıldı. Ilaj qatnasıwshıları oraydıń oqıw-tárbiya jumısı, qánigelestirilgen veterinariya xızmeti, tuwıw kompleksi hám “Kinologiya tariyxı” muzeyi menen jaqınnan tanıstı.

Esletip ótemiz, 24-oktyabr kúni Milliy kinologiya orayı shólkemlestirilgenine 29 jıl toladı. Usı múnásibet penen ilaj dawamında bir topar pidayı xızmetkerler Bajıxana komiteti baslıǵı tárepinen húrmet jarlıqları hám sawǵalar menen sıylıqlandı.

Qánigeli kinologlar hám olardıń xızmet iytleri tárepinen kórsetilgen ámeliy shınıǵıwlar hám kórgizbeli shıǵıwlar miymanlarda úlken tásir qaldırdı.

Shahnoza MAMATUROPOVA,
ÓzAnıń xabarshısı