Qaraqalpaqstan Respublikası sudında X.Sulaymanova atındaǵı Respublikalıq sud-ekspertiza orayınıń Qaraqalpaqstan Respublikası bólimi ekspertleri D.Tadjiev hám U.Rustamovalardıń qatnasıwında seminar shólkemlestirildi.

Ilajda respublikamızda jumıs alıp barıp atırǵan sudyalar hám sud sisteması xızmetkerleri qatnastı.
Seminardı ótkeriwdiń tiykarǵı maqseti sud ámeliyatında ekspertiza jumısınıń áhmiyetin arttırıw, sud xızmetkerleriniń bilim hám kónlikpelerin bekkemlew, tarawdaǵı sońǵı jańalıqlar menen tanıstırıwdan ibarat boldı.
Seminar dawamında qatnasıwshılarǵa sud lingvistikası tarawı haqqında tolıq maǵlıwmat berilip, ekspertler onıń izertlew obektleri, sonday-aq, sóz hám tekst analizi arqalı sud processlerinde dálillerdiń isenimliligin anıqlawdaǵı áhmiyeti haqqında túsinikler berdi.
Ilajda sud lingvistikası arqalı túrli xatlar, bayanatlar yamasa elektron jazısıwlardaǵı mánisti anıq talqılaw imkaniyatı artatuǵını atap ótildi.
Sonday-aq, ilajda sud hújjetlerin integraciya sisteması arqalı jiberiw tártibi, onıń abzallıqları hám elektron birge islesiwdiń nátiyjesi haqqında da toqtap ótildi. Bul sistema sud qararların jedel, anıq hám qáwipsiz tárizde jetkeriwdi támiyinlep, sud jumısın jáne de ashıq-aydın hám nátiyjeli etetuǵını atap ótildi.
Ekspertler sud-jer ekspertizası túsinigi, onıń qollanılıw tarawları hám ámeliy áhmiyeti haqqında maǵlıwmat berdi. Sonıń menen birge, ekspertiza qárejetlerin esaplaw tártibi, olardı sud islerin júrgiziwde durıs qollanıw mexanizmleri boyınsha da túsinikler berildi.
Seminarda Ózbekstan Respublikası Prezidentiniń 2025-jıl 21-avgustta qabıl etilgen 140-sanlı Pármanınıń áhmiyetine de ayrıqsha toqtalıp, bul hújjette sud-huqıq sistemasında sanlastırıw processlerin jáne de tereńlestiriw, málimleme texnologiyaların engiziw arqalı sistema nátiyjeliligin arttırıw wazıypaları belgilep berilgen. Ekspertler bul Párman sud islerin júrgiziwde zamanagóy málimleme sheshimlerin engiziwde jańa basqıshtı baslap bergenin atap ótti.
Ilaj juwmaǵında seminar qatnasıwshıları bayanatshılarǵa ózlerin qızıqtırǵan sorawlar menen múrájat etip, sudyalar hám sud xızmetkerleri ekspertizalardı tayınlaw, olardıń nátiyjelerin bahalaw hám zamanagóy sanlı sheshimlerden paydalanıw boyınsha ekspertlerden anıq hám ilimiy tiykarlanǵan juwaplar aldı.
Seminar sud sisteması xızmetkerleriniń bilim hám mamanlıǵın arttırıw, sud ekspertizası tarawındaǵı jańalıqlar menen tanıstırıw hám sanlastırıw processlerin ámeliyatqa keńnen engiziw jolında úlken áhmiyetke iye boldı.

Adilbay Orazov,
Qaraqalpaqstan xabar agentligi sholıwshısı.