Respublika Ruwxıylıq hám aǵartıwshılıq orayı tárepinen respublikamızdaǵı máhálleler, mektepler, oraylıq dem alıw orınları, shólkemler, áskeriy bólim hám áskeriy bilimlendiriw mákemelerinde «Kinokárwan» joybarı ámelge asırıldı.

Bunnan gózlengen maqset xalıqtıń mádeniy dem alıwın támiyinlew, máhállelerde jaslardıń bos waqtın mazmunlı shólkemlestiriw, olardı watansúyiwshilik ruwxında tárbiyalaw, xalıq arasında mádeniyat hám kórkem ónerdi úgit-násiyatlawǵa qaratılǵanı menen áhmiyetli.
Usı «Kinokárwan» ilajı sheńberinde Ellikqala rayonındaǵı Ábiw áli ibn Sina atındaǵı jámiyet salamatlıǵı texnikumında kórkem óner ǵayratkerleri hám aktyorlar menen ushırasıw shólkemlestirildi.
Ilajda texnikumnıń oqıwshı-jasları súyikli dóretiwshileri menen júzbe-júz sáwbetlesiw, ózlerin qızıqtırǵan sorawlarına juwap alıw imkaniyaitına iye boldı.
Ushırasıw dawamında jaslar kórkem óner áleminiń sırları, dóretiwshilik process hám milliy kinematografiyanıń búgingi kúndegi jetiskenlikleri haqqında qızıqlı maǵlıwmatlarǵa iye boldı.
Ilaj sońında qatnasıwshılarǵa Respublika Ruwxıylıq hám aǵartıwshılıq orayı hám birge islesiwshi shólkemler menen birgelikte súwretke túsirilgen «Meniń máhállem» kórkem filmi qoyıp berildi.

Qaraqalpaqstan xabar agentligi