Prezidentimizdiń tapsırmasına bola, 15-oktyabrden baslap pútkil respublikamızda tazalıq aylıǵı ótkerilmekte.
Aylıq dawamında barlıq máhálleler, mektep hám mektepke shekemgi bilimlendiriw mákemeleri, kósheler, jasaw punktleri aymaqlarında tazalıq ilajları ámelge asırılmaqta.

Sonday-aq, volontyorlar, jas eko-belsendiler qatnasıwında hár qıylı tazalıq akciyaları, ploggingler shólkemlestirilmekte.
Bunnan tısqarı, Qaraqalpaqstan Respublikası Ministrler Keńesi, Prokuraturası, Ekologiya, qorshaǵan ortalıqtı qorǵaw hám klimat ózgeriwi ministrligi, Milliy gvardiya hám Ishki isler xızmetkerlerinen ibarat arnawlı shtablar shólkemlestirildi. Bul shtablar tárepinen qala hám rayonlarda qatań ekologiyalıq qadaǵalaw ornatıldı hám jámiyetshilikke kúndelikli túrde maǵlıwmat berip barılmaqta.
Qalaberdi, aylıq dawamında ekologiyalıq huqıqbuzarlıqlarǵa qarsı turaqlı túrde reyd ilajları ámelge asırılmaqta. Atap aytqanda, shıǵındılardı belgilenbegen orınlarǵa taslaw juwapkershilikke sebep bolatuǵınlıǵı eskertilip, anıqlanǵan huqıqbuzarlıqlar boyınsha Ózbekstan Respublikası hákimshilik kodeksiniń tiyisli statyasına tiykarlanıp, huqıqbuzarlarǵa bayanlama rásmiylestirilmekte hám járiymalar belgilenbekte.
Ilajdıń tiykarǵı maqseti – qorshaǵan ortalıqtı qorǵaw, shıǵındılardıń nızamsız taslanıwın saplastırıw hám xalıqtıń ekologiyalıq mádeniyatın arttırıwdan ibarat.

Qaraqalpaqstan xabar agentligi.