Elimizde ámelge asırılıp atırǵan keń kólemli reformalar nátiyjesinde kóplegen kárxanalar óz jumısın baslamaqta. Bul bolsa, xalıqtıń bántligin támiyinlew hám kámbaǵallıqtı qısqartıwda úlken áhmiyetke iye bolmaqta.

Kegeyli rayonında másh ónimin qayta islewge qánigelesken “GLOBAL EXPORT” atlı jańa kárxana óz jumısın basladı. Bul kárxana zamanagóy texnologiyalar tiykarında, atap aytqanda, Qıtay hám Túrkiyadan alıp kelingen úskeneler járdeminde, hár jılı islep shıǵarıӯ potencialınan kelip shıǵıp, 2000-3000 tonnaǵa shekem másh ónimin qayta islew imkaniyatına iye. Qayta islengen ónimler tiykarınan eksportqa baǵdarlanadı.
Bul jerde ónimler xalıqaralıq talaplarǵa muwapıq tazalanadı, reńi hám kólemine qarap kallibrlenedi, tegislenedi, soń qadaqlanıp, sırt ellerge eksport etiledi. Álbette, belgili bir bólegi ishki bazarǵa da jetkerip beriledi.
Búgingi kúnde “GLOBAL EXPORT” qayta islew menen birgelikte, diyqan hám fermerler ushın qolaylı xızmetlerdi de usınbaqta. Olar atızlarda jetistirilgen másh ónimin jıynap alıp, qayta isleydi hám satıp aladı. Bul bolsa qol miynetin biraz jeńillestirip, ónimniń sapasın arttıradı hám diyqanlardıń dáramatın kóbeytiwge xızmet etedi.

Qaraqalpaqstan xabar agentligi.