Germaniyanıń “SINN Power” kompaniyası ishki suwda taza energiya islep shıǵarıw koncepciyasın ózgerte alatuǵın biybaha vertikal júziwshi quyash elektr stanciyasın paydalanıwǵa tapsırdı.

Sırt el ǵalaba xabar qurallarınıń xabar beriwinshe, bul kompleks Bavariyanıń Starnberg regionındaǵı Yays shaǵıl tas káninde jaylasqan. Qurılmanıń quwatlılıǵı 1,87 MVt, bul júzlegen shańaraqtı tok penen támiyinlew ushın jetkilikli. Panel kól aymaǵınıń tek ǵana 4,65 procentin ielegen.
– Bul innovaciyalıq joybardıń birinshi basqıshında tarmaqtaǵı energiya jumsalıwın ádettegi tutınıw dárejesine salıstırǵanda derlik 60 procentke azaytıw imkaniyatın berdi, – deydi “Kies- und Quetschwerk Jais” kompaniyasınıń direktorı Gottfrid Jeys. – Sistema jetilistirilgennen soń, quyash energiyasınıń ulıwma nátiyjeliligi 70 procentke jetti.
“Skipp-Float” sisteması quyash panelin vertikal túrde shıǵıstan batısqa qaray baǵdarlaydı hám dástúriy gorizontal jaǵdaydan ózgeshe túrde, kún dawamında energiya islep shıǵarıw imkaniyatın jaratadı.
– Process júdá ápiwayı, jer talap etilmeydi, sistema óndiris penen tolıq úylesedi, – deydi qánige. – Tiykarınan kúndiz, ásirese mart-dekabr ayları, quyashlı kúnde jedel isleytuǵın stanciyanıń dúzilisi kemeni esletedi: 1,6 metr tereńlikte ornatılǵan moduller samal hám ózgeriwsheń suw qáddi tásirinde erkin háreketlene aladı.
Energiya kól ekosistemasın buzbastan, júziwshi sım hám jaǵalıq jalǵanıw noqatı arqalı tarmaqqa uzatıladı.
Dáslepki ekologiyalıq monitoring kompleks qorshaǵan ortalıqqa zıyan jetkermeytuǵının kórsetti. Kerisinshe, júziwshi qurılma átirapındaǵı suwdıń sapası jaqsılandı, balıqlar, suw qusları ushın jańa tábiyǵıy jasaw ornı payda boldı.
– Energiyanı saqlaw hám almasıw procesin dıqqat penen baqlap baramız, tez arada jáne de únemli hám nátiyjeli sheshimler tabılatuǵınına úmit etemiz, – dep juwmaqladı Jeys.

Gwzal Sattorova, ÓzA