Tórtkúl rayonı «Ziyokor» máhálle puqaralar jıyınında jańadan qurılǵan 77-sanlı ulıwma orta bilim beriw mektebiniń zamanagóy imaratı paydalanıwǵa tapsırıldı.

«Ziyokor» máhállesinde búgingi kúnge shekem mektep joq edi. Sol sebepli oqıwshılar qońsı aymaqlardaǵı bilim beriw mákemelerine qatnawǵa májbúr edi. Jańa mekteptiń qurılıwı máhálle balalarına óz úylerine jaqın, barlıq zárúrli infrastruktura hám zamanagóy sharayatlarǵa iye bolǵan mektepte bilim alıw imkaniyatın jarattı.
Úsh qabatlı bilim máskanı 660 orınǵa mólsherlengen. Keń hám jaqtı sport zal, stadion, asxana, kitapxana, májilisler zalı, kompyuter xanası hám basqa da qolaylıqlar oqıwshılar ıqtıyarında.
Bul mektep eń zamanagóy ásbap-úskeneler menen támiyinlenip, pedagoglar hám muǵallimler ushın qolaylı jáne nátiyjeli tálim-tárbiya procesin támiyinlewge imkan berdi.
Saltanatlı ashılıw máresiminde rayon hákimligi basshıları, xalıq bilimlendiriw tarawı juwapkerleri, máhálle belsendileri hám keń jámiyetshilik wákilleri qatnasıp, jańa imaratta jaratılǵan sharayatlar menen jaqınnan tanıstı.
– Jańa oqıw jılı baslanıwı aldınan Prezidentimiz tárepinen bilimlendiriwdiń sapasın arttırıw hám tillerdi úyreniw potencialın keńeytiw máselelerine baǵıshlap úsh márte videoselektor májilisi ótkerildi. Jańa mektebimizdiń qurılıwı Prezidentimizdiń usı tarawǵa bolǵan joqarı itibarınıń bir kórinisi bolıp tabıladı, – deydi 77-sanlı mektep oqıtıwshısı Aziza Adamboeva. – Ásirese, «Mámleketlik til haqqında»ǵı nızam qabıl etilgeniniń 36 jıllıǵı qarsańında paydalanıwǵa tapsırılǵan bul mektep tek balalar hám muǵallimler ushın emes, al, pútkil máhálle xalqı ushın haqıyqıy bayram sawǵası boldı.

Qaraqalpaqstan xabar agentligi