Prezidentimiz tárepinen kitapqumarlıqtı qollap-quwatlaw, olar ushın sharayat jaratıw, qatarın kóbeytiw, ásirese, oqıwshı jaslardı kitapqumarlıqqa qızıqtırıw boyınsha alǵa qoyılǵan baslamalar, orınlarda ótkerilip atırǵan ilajlar óziniń unamlı nátiyjelerin bermekte.

Nókis rayonındaǵı Málimleme-kitapxana orayında bul baǵdarda bir qatar ilajlar alıp barılmaqta. Atap aytqanda, orayımızda ótken aydıń ózinde Ózbekstan Respublikası Prezidentiniń 2023-jıl 21-dekabrdegi ”Shańaraqlardı bekkemlew hám hayal-qızlardıń belsendiligin arttırıw boyınsha qosımsha ilajlar haqqında»ǵı qararına tiykarlanıp “Kitapqumar ana – ibrat mektebi” atamasında kitapqumar analar menen sáwbetlesiw keshesi bolıp ótti.
Keshede Nókis rayonı Hayal qızlar isleri boyinsha Úgit-násiyat toparınıń baslıǵı S.Uzakova, Málimleme-kitapxana orayınıń nuranıy kitapqumar analarınan G.Saparbaeva hám G. Qosbergenova, 14-sanlı mektep kitapxanashısı S.Aytjanova hám basqa da kitapqumar analarımız qatnasıp, ózleri oqıǵan kitaplardan aytıp, jaslarǵa kóplegen paydalı másláhátlerin berdi.
Sonday-aq, orayımızda Ózbekstan Respublikası Shańaraq hám hayal-qızlar komiteti hám Alisher Nawayı atındaǵı Ózbekstan Milliy kitapxanası menen birgelikte, hár aydıń 17-sánesi “Kitapqumar analar kúni” dep belgilengenligi múnásibeti menen “Milliy qádiriyatlarǵa húrmet kórsetiwdi shańaraqtan baslaymız!” súreni astında ZOOM platforması arqalı “Háyyiw – analar qosıǵı” onlayn festivalı da bolıp ótti.
Nókis rayonı Málimleme-kitapxana orayınıń qánigeleri rayondaǵı qánigelestirilgen mektepte shólkemlestirilgen kóshpeli kitapxanaǵa barıp, mektep kitapxanashısı menen birgelikte “Men Renessans qurıwshısıman” atamasında oqıwshılar menen sáwbetlesiw keshesin shólkemlestirdi.
Qánigeler oqıwshılarǵa Renessans sóziniń mánisi boyınsha túsinik berip, Orta Aziyada birinshi hám ekinshi renessans dáwiri haqqında maǵlıwmatlar berip ótti.
Birinshi Orta Aziya Renessansında (IX-X ásirler) Buxara, Samarqand, Xorezm de pán hám ádebiyatta úlken oyshıllar – Muxammed al-Xorezmiy, Beruniy, Ibn Sino, Rudakiyler, ekinshi Orta Aziya Renessansında A.Nawayı, Jomiy, Mırza Uluǵbekler miynet etken.
Házirgi kúnde ǵárezsizlikten keyingi waqıtta ilim, bilimlendiriw hám mádeniyatta jańadan rawajlanıw basqıshı, úshinshi Renessans oyanıw dáwiri dep bahalanbaqta.
Oqıwshılar qızıǵıwshılıq penen tıńlap, ózleri qızıqqan sorawların berdi soń, kitapxanamızǵa kelip túsken taza ádebiyatlar menen tanıstırıldı.
Orayda bul baǵdardaǵı ilajlar nátiyjeli dawam etpekte.

G.Seydullaeva,
Nókis rayonlıq Málimleme-kitapxana orayınıń, fondlardı komplektlew hám qayta islew xızmetiniń baslıǵı.
Qaraqalpaqstan xabar agentligi.