Kamerunda ekshembi kúni bolıp ótken saylawda Afrikanıń eń jası úlken basshısı, 92 jastaǵı Prezident Pol Biya jáne jeti jıllıq múddetke hákimiyatta qalıw ushın kandidaturasın alǵa qoydı. 1982-jıldan berli mámleketti basqarıp kiyatırǵan Biya, eger jeńip shıqsa, 99 jasqa shekem hákimiyat basında qaladı. Kamerun 1960-jılı ǵárezsizlikke eriskennen berli tek eki prezident kórgen.

Pol densawlıǵı, uzaq jıllıq húkimdarlıǵı hám mámlekettegi ekonomikalıq krizis sebepli barǵan sayın kóbirek sınǵa alınıp atır. Ol kóp waqtın Evropada ótkeredi, mámleket basqarıwı bolsa hámeldarlar hám shańaraq aǵzalarınıń qolında.
“Syracuse” universitetiniń professorı Benjamin Akidiń pikirinshe, bul retki saylaw Biya ushın qáwipli ótiw itimalı bar.
– Ol júdá qartayǵan hám mámleket 43 jıllıq basqarıwdan sharshaǵan, – deydi ilimpaz. – Endi nátiyje basqasha bolıwı múmkin.
Saylawda Biya menen birge toǵız talaban qatnastı. Olardıń arasında burınǵı ministrler Bello Bouba Maigari hám Issa Tchiroma Bakari de bar. Nátiyjeler 26-oktyabrge shekem járiyalanadı.
Kamerun házir eki úlken mashqala menen dus kelgen: batısta anglichan tilles separatistler menen urıs, al arqada bolsa “Boko Haram” qáwpi. BMSh maǵlıwmatına bola, bul mámleket xalqınıń 43 procenti kámbaǵallıqta jasaydı.
Bul saylaw Pol ushın tariyxıy sınaq boladı. Mámlekettegi jas áwlad álle qashan “ózgeris samalı”n seze baslaǵan.

Musulmon Ziyo, ÓzA