Jaslar arasında jazba sawatlılıq mádeniyatın keń úgit-násiyatlaw, ózbek tiline bolǵan húrmet hám qızıǵıwshılıqtı jáne de arttırıw, onıń sociallıq avtoritetin bekkemlew maqsetinde Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Bilim hám qánigeliklerdi bahalaw agentliginde «Ǵalabalıq diktant» akciyası ótkerildi.

«Milliy tiklanish» demokratiyalıq partiyası Qaraqalpaqstan Respublikası Keńesi, Qaraqalpaqstan Respublikası Ministrler Keńesiniń Mámleketlik tildi rawajlandırıw departamenti, Joqarı bilimlendiriw, ilim hám innovaciyalar ministrligi, Áliysher Nawayı atındaǵı Tashkent mámleketlik til hám ádebiyatı universiteti janındaǵı mámleketlik tilde jumıs alıp barıw tiykarların oqıtıw hám tájiriybe arttırıw orayınıń Qaraqalpaqstan Respublikası aymaqlıq bólimi, Berdaq atındaǵı Qaraqalpaq mámleketlik universiteti menen birgelikte ótkerilgen ilajda respublikamızdaǵı joqarı oqıw orınlarınıń studentleri qatnastı.
– «Milliy tiklanish» demokratiyalıq partiyasınıń saylawaldı baǵdarlamasında ózbek tiliniń mámleketlik til sıpatında abırayın arttırıw, onıń qollanılıw sheńberin keńeytiw, jas áwladtı ózbek tiline húrmet ruwhında tárbiyalaw sıyaqlı wazıypalar belgilengen, – deydi ÓzMTDP Qaraqalpaqstan Respublikası Keńesi baslıǵınıń orınbasarı M.Tajimuratov. – Usı wazıypalardıń orınlanıwı sheńberinde «Ǵalabalıq diktant» ilajı shólkemlestirildi. Partiyamız ózbek tilin rawajlandırıw, onıń abırayın arttırıwǵa qaratılǵan usınday ilajlardı turaqlı túrde qollap-quwatlap kelmekte.
Ilajdıń jeńimpazları hám belsendi qatnasıwshılar 21-oktyabr – «Mámleketlik til haqqında»ǵı nızam qabıl etilgeniniń 36 jıllıǵı qarsańında sıylıqlanadı.

Qaraqalpaqstan xabar agentligi