15-oktyabr – Xalıqaralıq awıl hayalları kúni

Kewil qaysı mánzilde quwanısh, qáterjamlıq tapsa, sol mákan onıń súyikli elatına aylanadı. Qaharmanımız Zulfiya Bekmuratova da qálb tınıshlıǵın Beruniy rayonınıń «Orazbay Jumaniyazov» máhállesinen (burınǵı Kirov awılı) taptı. Buxara wálayatınan usı awılǵa kelin bolıp túskenine 44 jıl bolǵan Zulfiya apa miynetkesh, kúndi kún, túndi tún demeytuǵın awıl hayalı.
Z.Bekmuratova elimizde ámelge asırılıp atırǵan reformalar menen izbe-iz adımlap atırǵan, berilip atırǵan imkaniyatlardan aqılǵa uǵras paydalanıp, abadan turmıs keshirip atırǵan hayallardan biri. Ol rayondaǵı 61-sanlı ulıwma orta bilim beriw mektebinde fizika páninen sabaq berip, usı jerden pensiyaǵa shıqqan. Soń 15 jıl dawamında máhálle hayal-qızlar belsendisi lawazamında islegen. Kóplegen ajırasıw aldında turǵan shańaraqlardıń jarasıwına, máhálledegi ruwxıy ortalıqtıń jaqsılanıwına óz úlesin qosıp kelmekte. Máhállede belsendi nuranıylarǵa basshılıq etip kelmekte. «Bir nuranıy on jasqa juwapker» principi tiykarında máhálledegi jaslardıń kásip-óner úyreniwine de qolqanat bolmaqta.
– Baxıtlıman, – deydi Z.Bekmuratova. – Ómirlik joldasım menen tórt perzentti kámalǵa keltirmektemiz. Olardıń barlıǵı joqarı oqıw orınlarında bilim alǵan. Búgingi kúnde 12 aqlıqtıń ájesimen. Olar da keleshekte eline, xalqına paydası tiyetuǵın insanlar bolıp erjetiwi ushın miynet etip atırmız.
Z.Bekmuratovanıń kóp jıllıq miyneti inabatqa alınıp, Qaraqalpaqstan Respublikası Joqarǵı Keńesi tárepinen «Ibratli hayal» kókirek belgisi menen sıylıqlandı. Ibrat bolsa arzırlıq awıl hayalınıń miyneti búgingi kúnde jas shańaraqlarǵa órnek bolmaqta.
Zulfiya apa sıyaqlı kópshilik awıl hayalları dala jumısı, sharwa, qıytaq jerge qaraw sıyaqlı turmıs táshwishlerine oratılıp qalmastan, elimizdiń rawajlanıwı hám xalıq abadanlıǵı jolında miynet etpekte. Olardıń kewli awıl dalaları sıyaqlı keń. Barına qanaat etip, joǵın jasırıp, barın arttırıp jasap kiyatırǵan bul hayallar erteńgi kún dawamshıların tárbiyalamaqta.

Qaraqalpaqstan xabar agentligi