Saudiya Arabstanı paytaxtı Ar-Riyod qalasında “Islam tileklesligi” oyınlarınıń baslanıwına bir aydan az waqıt qalǵanda Xalıqaralıq Islam tileklesligi sport associaciyası (ISSA) 2029-jılǵı oyınlardı ótkeriwshi mámleketlerdiń atın járiyaladı.

Biz ushın itibarlı tárepi, jáne tórt jıldan keyin shólkemlestiriliwi rejelestirilgen “Islam tileklesligi” oyınlarına basshılıq etiwi múmkin bolǵan úsh mámleketten biri Ózbekstan ekeni atap ótildi.
Bul haqqında sóz etken Xalıqaralıq islam tileklesligi sport associaciyasınıń bas xatkeri Nosir Madjali 2029-jılǵı oyınlardı ótkeriwge Ózbekstan, Malayziya hám Iran mámleketleri anıq dawager ekenin atap ótip, jaqın arada ISSA komissiyası bul mámleketlerdegi bar sport infrastrukturası menen jaqınnan tanısatuǵının bildirip ótti.
ISSAǵa aǵza 57 mámlekette sport túrleri jedel rawajlanıp atırǵanına qaramastan, Olimpiada medallarınıń tek ǵana 7 procenti olardıń úlesine tuwra keledi.
“Islam tileklesligi” oyınlarınıń sistemalı ótkeriliwiniń jolǵa qoyılıwı, sport integraciyasınıń islam mámleketlerinde keńnen en jaydırılıwı nátiyjesinde Olimpiada medallarınıń salmaǵı olardıń jáne de artıwına xızmet etiwine qaratılǵan, delinedi ISSA xabarında.
Usı jıldıń 7-21-noyabr kúnleri Ar-Riyodta bolıp ótetuǵın VI “Islam tileklesligi” oyınlarında 57 mámleketten 4 mıńnan aslam sportshı 13 olimpiada, 5 olimpiada emes sport túrlerinde qatnasıw ushın talapnamalar bergenin atap ótiw kerek.
Esletip ótemiz, mámleketimiz sportshıları 2022-jılı Túrkiyanıń Konya qalasında ótken V “Islam tileklesligi” oyınlarında 51 altın, 42 gúmis hám 65 qola medalların qolǵa kirgizip, 56 qatnasıwshı mámleket arasında 2-orındı iyelegen edi.

Twlqin Rwziev, ÓzA