Xabarıńız bar, futbol boyınsha gezektegi Jáhán chempionatı AQSh, Meksika hám Kanada mámleketlerinde bolıp ótedi. Usı kúnlerde dúnyanıń hár qıylı orınlarında jarısqa jollama beretuǵın saylap alıw basqıshları ótkerilmekte.

Bul saylap alıwlar dawamında Ózbekstan, Yaponiya, Jańa Zelandiya, Iran, Argentina, Koreya Respublikası, Iordaniya, Avstraliya, Ekvador, Braziliya, Urugvay, Kolumbiya, Paragvay, Marokko, Tunis, Egipet, Aljir, Gana hám Kabo-Verde mámleketleri mundial jollamasın qolǵa kirgizdi. Sonday-aq, AQSh, Kanada hám Meksika saylandı komandaları jarıs sol jerde bolǵanı ushın tikkeley qatnasıw huqıqına iye.
Sonı atap ótiwimiz kerek, Ózbekstan bul Jáhán chempionatında qatnasatuǵın Oraylıq Aziyanıń birden-bir milliy saylandı komandasına aylandı.
Gáp sonda, oktyabr ayındaǵı FIFA kúnlerinde Qazaqstan milliy saylandı komandası da óz tariyxında birinshi márte Jáhán chempionatına jollama alıw ushın gúresip atırǵan edi.
Qazaqstan Evropa regionı saylap alıw turniri “J” toparındaǵı gezektegi tur ushırasıwın saparda Arqa Makedoniyaǵa qarsı ótkerdi hám 1:1 esabında teńbe-teń oynadı. Joytılǵan eki ochko ámelde qońsılarımızdı mundialǵa shıǵıw imkaniyatınan ayırdı.

Javohir Toshxwjaev,
ÓzA