Sońǵı jılları recept penen beriletuǵın dári qurallarınıń nızamsız aylanısı, olardı nızamǵa qayshı túrde realizaciyalaw hám insan ómiri ushın qáwipli aqıbetlerge sebep bolıp atırǵan jaǵdaylar kóbeymekte.

Oliy Majlis Nızamshılıq palatasınıń gezektegi májilisinde bir topar deputatlar tárepinen nızamshılıq baslaması huqıqı tiykarında islep shıǵılǵan recept penen beriletuǵın dári qurallarınıń nızamsız aylanısı ushın juwapkershilikti kúsheytiwdi názerde tutatuǵın nızam joybarı birinshi oqıwda konceptuallıq jaqtan kórip shıǵıldı.
– Ámeldegi nızamshılıqta recept penen beriletuǵın dári quralları sheńberindegi huqıqbuzarlıqlar ushın belgilengen sankciyalar sáykes emes bolıp, dári quralları hám medicinalıq buyımlardıń nızamsız aylanısına shek qoyıw hám onıń aldın alıw boyınsha huqıqıy mexanizmlerdi bunnan bılay da jetilistiriw zárúrligi júzege kelmekte, – dedi deputat Tohir Polvonov. – Atap aytqanda, tallawlarǵa bola, 2022-2025-jıllar dawamında 18 milliard sumlıq 285 mıń dana dári-dármaq nızamsız aylanıstan alıp qoyılǵan. Tek ǵana 2024-jılı bunday jaǵdaylar 2022-jılǵa salıstırǵanda 3 esege kóbeygen. 2021-2024-jıllarda dári-dármaqtan záhárlengen shaxslardıń sanı 18 mıń 87 ni quraǵan.
Nızam joybarı menen Ózbekstan Respublikasınıń Jınayat hám Hákimshilik juwapkershilik haqqındaǵı kodekslerine recept tiykarında beriletuǵın dári qurallarınıń nızamsız aylanısına qarsı jaza ilajların kúsheytiw usınıs etilmekte. Sonıń ishinde, quramında kúshli tásir etetuǵın elementler bolǵan dári quralların recept boyınsha usaqlap realizaciyalaw tártibin buzıw, usınday háreket ushın hákimshilik jaza qollanılǵannan soń yamasa kóp muǵdarda islengen jaǵdaylarda – jınayıy juwapkershilik belgilew hám eki júz esesinen úsh júz esesine shekemgi muǵdarda járiyma jazası názerde tutılmaqta.
Sonday-aq, Hákimshilik juwapkershilik haqqındaǵı kodekske quramında kúshli tásir etetuǵın elementler bolmaǵan dári quralların hám quramında kúshli tásir etetuǵın elementler bolǵan dári quralların recept boyınsha usaqlap realizaciyalaw tártibin buzǵanı ushın ámelde belgilengen járiymalar muǵdarın arttırıwdı názerde tutatuǵın ózgerisler kirgizilmekte.
Nızam joybarınıń qabıl etiliwi xalıqtıń densawlıǵın isenimli qorǵaw, dári qurallarınıń nızamsız aylanısına shek qoyıw hám bul tarawda huqıqbuzarlıqlarǵa qarsı gúresiw nátiyjeliligin bunnan bılay da arttırıwǵa xızmet etedi.
Dodalawlardan soń nızam joybarı deputatlar tárepinen ekinshi oqıwda qabıl etildi.

ÓzA