Usı jıldıń 4–9-oktyabr kúnleri Qaraqalpaqstan Respublikası Ministrler Keńesi Baslıǵınıń orınbasarı R.Zarikeevtiń basshılıǵındaǵı Qaraqalpaqstan delegaciyası Qazaqstanda rásmiy saparda boldı.

Sapar sheńberinde turizmdi rawajlandırıw, qatnasıqlardı bekkemlew hám transshegaralıq Geopark jaratıw ushın Qazaqstan tájiriybesin úyreniw boyınsha birge islesiw jolǵa qoyıldı. Qaraqalpaqstan delegaciyası Aral geoparkiniń áhmiyetli jerleri, sonıń ishinde, ol jerdegi tábiyǵıy hám mádeniy dıqqatqa ılayıq Kanon hám Akespe awılında saparda boldı.
Sapar dawamında ekoturizm, geopark infrastrukturası, sonday-aq, Aralboyı tábiyǵıy hám mádeniy miyrasın qorǵaw baǵdarındaǵı qospa ilimiy-izertlewler baǵdarındaǵı jumıslar talqılandı.
Sapar sheńberinde Xalıqaralıq Araldı qutqarıw fondı Qazaqstan Respublikası Atqarıw direkciyasında Qaraqalpaqstan Respublikası delegaciyası menen dɵgerek sáwbeti de bolıp ɵtti. Qatnasıwshılar Qazaqstan hám Qaraqalpaqstan Respublikalarınıń tábiyǵıy hám mádeniy miyrasın, sonday-aq, suw resursların, turizm hám ilim tarawların birlestiretuǵın transshegaralıq Geopark jaratıw múmkinshiliklerin talqıladı.
– Házirgi waqıtta dúnya júzi boylap 200 den aslam geoparkler bolıp, olardıń derlik kópshiligi geologiyalıq obektlerdi saqlaw menen birge, turizm hám bilimlendiriw tarawları arqalı jergilikli ekonomikanı rawajlandırıwǵa xızmet etpekte, – deydi Araldı Qutqarıw Xalıqaralıq qorı Atqarıw komiteti Nókis filialınıń direktorı A.Mambetkarimov.
«Geopark Aral» joybarı da ekologiya hám ilimiy-izertlewler, turizm infrastrukturasında jańa imkaniyatlar esigin ashadı. Aralboyı aymaǵı – ózine tán tábiyǵıy landshaftlar, shól aymaqları, tariyxıy-mádeniy estelikler hám jergilikli xalıqtıń bay etnografiyalıq miyrası menen sırt elli turistler ushın payızlı mákan bolıp esaplanadı.
Qaraqalpaqstan delegaciyasınıń Qızılorda wálayatına saparı dawam etip, Transshegaralıq geoparkti jaratıw boyınsha Qazaqstan tájiriybesi talqılandı. Sapar dawamında eki xalıq arasındaǵı birge islesiwdi jańa basqıshqa kɵteriw, sonday-aq, táreplerdiń transshegaralıq baslamaların tayarlaw ushın birgelikte jumıs alıp barıwdı dawam ettiriw niyetinde ekenligi atap ɵtildi.
Bul jerde Qızılorda wálayatı hákimiyatı hám Qaraqalpaqstan Respublikası Ministrler Keńesi arasında transshegaralıq geoparkti jaratıw boyınsha baslamalardı rawajlandırıw hám birge islesiw boyınsha memorandumǵa qol qoyıldı.
Memorandumǵa qol qoyılıwı táreplerdiń turaqlı rawajlanıwı, ekologiya hám ilim tarawındaǵı birge islesiwdi kúsheytiw, geoturizmdi alǵa ilgeriletiw hám Aral teńizi tábiyǵıy miyrasın qorǵaw ushın ulıwmalıq platformanı qáliplestiriwge úles qosadı.

Á.Jiyemuratov,
Qaraqalpaqstan xabar agentligi