Qaraqalpaqstan Respublikası Ministrler Keńesiniń Baslıǵı F.Ermanovtıń basshılıǵında barlıq mámleketlik shólkemler hám uyımlar basshılarınıń qatnasıwında gúzgi-qısqı máwsimdi zıyansız ótkeriw boyınsha sın kózqarastan májilis bolıp ótti.

Onda ministrlikler, juwapker shólkemler hám tiyisli xızmet kórsetiwshi kárxanalardıń basshıları, joqarı oqıw orınlarınıń rektorları, máhálle baslıqları hám ǵalaba xabar qurallarınıń wákilleri qatnastı.
Ilajda respublikamızda gúzgi-qısqı máwsimdi zıyansız ótkeriw, infrastruktura hám sociallıq taraw obektlerinde anıqlanǵan kemshiliklerdi qısqa múddetlerde saplastırıw máseleleri hár tárepleme dodalandı.
Májilis dawamında elektr energiyası, tábiyǵıy hám suyıltırılǵan gaz, ıssılıq támiynatı, ishimlik suwı tarmaqları jáne janılǵı rezervlerin qáliplestiriwdegi mashqalalar boyınsha juwapkerlerdiń esabatı tıńlandı.
Qaraqalpaqstan Respublikası Ministrler Keńesiniń Baslıǵı tárepinen anıqlanǵan kemshiliklerdi qısqa múddette saplastırıw, sonday-aq, qıs máwsiminde úzliksiz ıssılıq hám energiya támiynatın jolǵa qoyıw boyınsha anıq tapsırmalar berildi.
Májilis juwmaǵında barlıq juwapker basshılarǵa qıs máwsimin zıyansız ótkeriw boyınsha hár bir tarawda jeke juwapkershilik penen qatnas jasaw, orınlarda sistemalı qadaǵalawdı kúsheytiw hám xalıqtıń shaǵımlarına jedel juwap beriw zárúr ekenligi atap ótildi. Sonday-aq, belgilengen wazıypalardıń orınlanıwı qatań qadaǵalawǵa alınatuǵını málim etildi.

ÓzA