Huqıqıy qatnas

Hár bir fizikalıq shaxs óziniń razılıǵısız yamasa xabarısız kredit rásmiylestiriliwiniń aldın alıw ushın kredit kelisimin dúziwdi qadaǵan etiw huqıqına iye.
Xosh, bunıń ushın puqara qay jerge múrájat etiwi kerek?
Tashkent mámleketlik yuridikalıq universiteti Yuridikalıq klinikasınıń xızmetkeri Imomali Tuev bul boyınsha tómendegishe túsinik berdi:
– Bul jaǵdayda puqara dáslep, kredit byurosına arza beriwi kerek boladı.
Arza beriw bolsa tómendegiler arqalı ámelge asırıladı. Sonıń ishinde, Birden-bir interaktiv mámleketlik xızmetler portalı arqalı elektron túrde, mámleketlik xızmetler orayları arqalı jazba yamasa elektron túrde, kredit byurolarına tikkeley múrájat etiw arqalı arza beriw múmkin boladı.
Arza berilgennen soń, ol dárhal reestrge kirgiziledi hám kredit kelisimin dúziwge qadaǵan etiledi. Puqara qálese, qadaǵalawdı alıp taslaw ushın da arza beriwi múmkin.Bul xızmetler biypul kórsetiledi.
Reestrdiń huqıqıy áhmiyeti sonda, kredit byurolari fizikalıq shaxslardıń arzaları tiykarında dizim júrgizedi.
Bankler, bank emes kredit shólkemleri yamasa mikrofinans shólkemleri reestrdi tekserip kórmesten kredit kelisimin dúziwi múmkin emes.
Eger usınday jaǵday júz berse, yaǵnıy puqaranıń xabarısız kredit rásmiylestirilse, barlıq huqıqıy aqıbetler usı finanslıq shólkemniń moynına júklenedi.
Bunnan juwmaq sonda, bul kepillik puqaralardıń huqıqların qorǵaydı – puqara qálese, kredit rásmiylestiriliwin qadaǵan etip qoyıwı múmkin. Bul tártip olardı aldawshılıqtan qorǵaydı hám bankler jáne kredit shólkemlerine juwapkershilik júkleydi.
TIYKAR: “Kredit informaciyası almasıwı haqqında”ǵı Ózbekstan Respublikası nizamı, 161-statya.

Gulnoza Boboeva, ÓzA