Házirgi waqıtta Sharm ash-Sheyxte Gaza boyınsha tınıshlıq kelisimin rásmiy tastıyıqlaytuǵın sammit ótkerilmekte. Egipette jıynalǵan jigirmaǵa shamalas mámleket basshıları arasında Batıs, arab hám musılman mámleketleriniń jetekshileri bar, dep xabar berdi BBC basılımı.

AQSh, Qatar, Egipet hám Túrkiya Gaza sektorındaǵı urıstı toqtatıw haqqında qol qoyǵan kelisim kóplegen qaǵıyda, reje hám basqa da máselelerdi óz ishine alǵan áhmiyetli hújjet esaplanadı.
Ilajǵa jetip kelgen AQSh jetekshisi Donald Tramp ámelge asırılıp atırǵan kelisimniń ekinshi basqısh sóylesiwleri baslanǵanın málim etti. Ol Egipet Prezidenti Abdulfattoh As-Sisi menen birge jurnalistlerdiń sorawlarına juwap berdi:
– Ekinshi basqısh, biziń kózqarasımız boyınsha, baslandı. Bilesiz, basqıshlar bir-biri menen únles. Endi Gazanı tiklewge kirisedi. Túrli mámleketlerden kelgen jetekshiler, mirát etilgen barlıq qatnasıwshılar ulıwma jumısqa húrmet kórsetpekte.
“Anadolu”dıń jazıwınsha, eger Iran AQSh penen sóylesiwge tayar bolsa, bul mámleketten sankciya alıp taslanıwı múmkin ekeni de járiyalanǵan.
Aq úy basshısı 13-oktyabrdi Jaqın Shıǵıs ushın, juwmaǵında tınıshlıq alıp kelgen “ullı kún” dep atadı. “Búgin biz belgilep atırǵan burılıs waqıyası Gazadaǵı urıs tamam bolıwınan da áhmiyetlirek. Bul pútkil Jaqın Shıǵıs ushın jańa dáwirdiń baslanıwı”, dep qosımsha etken Amerika basshısı.

B.XUDOYBERDIEV, ÓzAnıń xabarshısı