Qaraqalpaqstan awıl xojalıǵı hám agrotexnologiyalar institutında «Altı dyuym topıraq» hújjetli filminiń prezentaciyası bolıp ótti. Maqset – degredaciyaǵa ushıraǵan jerlerdiń ónimdar qatlamın qayta tiklew boyınsha Ullı Britaniya tájiriybesin úyreniw hám onı Qaraqalpaqstan sharayatında qollanıw imkaniyatların dodalawdan ibarat.

Ilajda Ullı Britaniyanıń Ózbekstandaǵı elshixanasınıń wákilleri, Ózbekstan Respublikası Awıl xojalıǵı ministrliginiń juwapkerleri, ilimiy-izertlew institutlarınıń ilimpazları, óndiris wákilleri, fermerler, professor-oqıtıwshılar hám student-jaslar qatnastı.
Prezentaciya juwmaǵında filmde sáwlelendirilgen aldıńǵı tájiriybeler hám innovaciyalıq kózqaraslar boyınsha ashıq pikirlesiw shólkemlestirildi. Institut rektorı B.Jollıbekov basshılıǵında ótkerilgen dodalawda qatnasıwshılar bul tájiriybeni Qaraqalpaqstan sharayatında engiziw imkaniyatları haqqında óz pikir-usınısların bildirdi.
Ilaj juwmaqlanǵannan soń Ullı Britaniyanıń Ózbekstandaǵı elshixanası wákillerine jańa zamanagóy laboratoriyalar tanıstırılıp, birge islesiwdi jáne de keńeytiwge kelisip alındı.

Qaraqalpaqstan xabar agentligi