Usı jıldıń 19-sentyabr kúni Ózbekstan Respublikası Prezidenti tárepinen “Ózbekstan Respublikasında xalıq hám awıl xojalıǵın dizimge alıw ilajın ótkeriw haqqında”ǵı pármanı qabıl etildi.

Pármanǵa bola Ózbekstanda 2026-jıl 15-yanvardan 28-fevralǵa shekem xalıq hám awıl xojalıǵın dizimge alıw ilajı ótkeriledi. Bul process mámleketimizdiń sociallıq-ekonomikalıq rawajlanıwın strategiyalıq rejelestiriwde úlken áhmiyetke iye.
– Ilaj eki basqıshta ámelge asırıladı, – deydi Qaraqalpaqstan Respublikası statistika basqarması baslıǵınıń orınbasarı K.Omarov.
Aldın 15-31-yanvar aralıǵında puqaralar “census.stat.uz” portalı arqalı (fizikalıq shaxstıń jeke identifikaciya nomeri) onlayn dizimnen ótiwi múmkin. Usı basqıshta toplanǵan maǵlıwmatlar 3 kún ishinde talqılanadı. Keyingi basqıshta, yaǵnıy 4-28-fevral kúnleri aralıǵında “máhálle jetiligi” hám basqa da belsendiler úyme-úy júrip maǵlıwmat toplaydı.
Bul arqalı – xalıq haqqında tolıq maǵlıwmat jıynaw: shańaraqlardıń quramı, jaslar hám kekselerdiń úlesi, bilimlendiriw dárejesi, bántlik jaǵdayı hám migraciya processleri, sonday-aq, awıl xojalıǵındaǵı jaǵday: jerden paydalanıw, sharwashılıq hám qusshılıq kórsetkishleri anıqlanadı.
Dizimge alıw jumıslarınıń qıs máwsimine mólsherlengeni de qolaylıq jaratadı. Sebebi, bul dáwirde xalıq kóp háreketlenbeydi, awıl xojalıǵında máwsimlik jumıslar azayadı. Bul nárse fermerler hám diyqanlar ushın da maǵlıwmat beriwde jeńillik jaratadı.
Eń áhmiyetlisi – dizimge alıw procesi tek ǵana sanlardı jıynaw ushın emes, al puqaralardıń turmıs dárejesin jaqsılawǵa xızmet etetuǵın áhmiyetli qararlar qabıl etiw ushın tiykar boladı.
Házirgi waqıtta orınlarda tayarlıq jumısları alıp barılmaqta. Ózbekstan Respublikası milliy statistika komiteti tárepinen tiyisli qánigelerdi (trenerlerdi) tayarlaw jumısları alıp barılmaqta. Sonday-aq statistika basqarmasında arnawlı shtab xám Call-centr shólkemlestirilip, shólkemlestiriw rejesi tayarlanbaqta hám máhállelerdegi xalıqtıń sanıń jetilikke bólistiriw jumısları alıp barılmaqta.

Á.Jiyemuratov,
Qaraqalpaqstan xabar agentligi