Egipettiń paytaxtı Kair qalasında para-pauerlifting boyınsha jas óspirimler hám jaslar arasında jáhán chempionatı bolıp ótti.

Jarısqa dúnya júziniń 27 mámleketinen 120 sportshı qatnastı. Qızǵın bellesiwlerge tolı ótken jarıs juwmaǵında, Ózbekstan saylandı komandası aǵzaları 27 altın, 11 gúmis hám 9 qola medalın qolǵa kirgizip, ulıwma komandalıq esapta birinshi orındı iyelewge miyasar boldı. Áhmiyetli tárepi sonda, komandamızdıń bul úlken jeńisine qaraqalpaqstanlı para atletler de ózleriniń salmaqlı úlesin qostı. Atap aytqanda, jas óspirimler arasında 88 kg salmaqta jarısqa qatnasqan Azizbek Perdebaev altın, jaslar arasında 88 kg da Husniddin Usmanjanov bir gúmis hám qola medalın, qızlar arasında 55 kg Zuxra Yuldasheva hám 79 kg da Tursınay Tursınbaeva altın hám Azada Baltabaeva qola medalların jeńip alıwǵa miyasar boldı.
– Para-pauerlifting sportı respublikamızǵa 2017-2018-jılları kirip kelgen edi, – deydi Husniddin Usmanjanovtıń ustazı Islam Rwzibaev. – Mine sonnan berli, respublikamız wákilleri Ózbekstan hám Aziya chempionatlarında qatnasıp kelmekte. Búgingi jeńis respublikamız para-pauerliftingleriniń qolǵa kirgizgen eń úlken jeńisi boldı. Endi usı jıldıń 7-21-dekabr kúnleri Birlesken Arab Ámirlikleriniń Dubay qalasında ótkeriletuǵın ParaAziya oyınlarına tayarlıq kóremiz.
Jeńimpaz parasportshılardı jarısqa Quralbay Orazımbetov hám Islam Rwzibaevlar tayarladı.
Búgin bul jeńimpaz parasportshılarımız Nókis Temir jol vokzalında Qaraqalpaqstan Respublikası Sport ministrliginiń wákilleri, trenerler hám ǵalaba xabar quralları xızmetkerleri menen birge saltanatlı túrde kútip alındı.

Adilbay Orazov,
Qaraqalpaqstan xabar agentligi sholıwshısı.