Qaraqalpaqstan Respublikası Densawlıqtı saqlaw ministrligi hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi tárepinen Qaraqalpaqstan Respublikası aymaqlıq balalar medicinalıq reabilitaciya orayında medicina xızmetkerleri arasında salamat turmıs tárizin úgit-násiyatlaw, olardı sportqa keńnen tartıw maqsetinde, sporttıń shaxmat, shashka, stol tennisi, mini-futbol túrleri boyınsha Spartakiada shólkemlestirildi.

Spartakiadanıń ashılıw máresiminde Qaraqalpaqstan Respublikası Densawlıqtı saqlaw ministriniń orınbasarı Gawhar Abdisametova, Ózbekstan densawlıqtı saqlaw xızmetkerleri kásiplik awqamı Qaraqalpaqstan Respublikası Qaraqalpaqstan Respublikası Keńesiniń baslıǵı Lizaxan Baybosınova, Salamatlıq hám strategiyalıq rawajlanıw institutı Qaraqalpaqstan Respublikası aymaqlıq bóliminiń baslıǵı Gulayim Shrazova, Qaraqalpaqstan Respublikası Sport ministrliginiń ǵalabalıq sporttı rawajlandırıw bóliminiń baslıǵı Ikram Qudiyarovlar shıǵıp sóylep, jarıs qatnasıwshılarına tabıslar tiledi.
Qızǵın ótken sport jarısları juwmaǵında, shashka boyınsha hayal-qızlar arasında, qanlıkólli Nursulıw Uzaqbaeva birinshi, bozatawlı Elmira Satbaeva ekinshi hám Respublikalıq qıstawlı medicinalıq járdem ilimiy orayı Qaraqalpaqstan filialı xızmetkeri Peruza Doshanova úshinshi orınlardı iyelegen bolsa, erler arasında Respublikalıq qıstawlı medicinalıq járdem ilimiy orayı Qaraqalpaqstan filialı xızmetkeri Quwatbay Tóreshov birinshi, Respublika kóp tarmaqlı medicina orayı xızmetkeri Darmen Amaniyazov ekinshi hám qońıratlı Uktam Reypovlar úshinshi orınǵa miyasar boldı. Shaxmat boyınsha ótkerilgen bellesiwlerde taxtakópirli Mafruza Reymova birinshi, shımbaylı Rawshan Sultanova ekinshi hám qanlıkólli Íǵbal Smaylova úshinshi orınlarǵa múnásip dep tabıldı. Erler arasında ótkerilgen jarıslarda ellikqalalı Hamdam Durdievke teń keletuǵın qarsılas tabılmadı. Respublikalıq qıstawlı medicinalıq járdem ilimiy orayı Qaraqalpaqstan filialı xızmetkeri Adilbay Reyimbaev hám Densawlıqtı saqlaw ministrligi xızmetkeri Mels Eskabulovlarǵa ekinshi hám úshinshi orınlar nesip etti. Sporttıń stol tennisi túri boyınsha hayal-qızlar arasında nókisli Luiza Alieva birinshi, taqıyataslı Jánnet Tatikova ekinshi hám moynaqlı Aynash Maxambetalieva úshinshi, erler arasında moynaqlı Sanjar Esjanov birinshi, nókisli Aybek Atamuratov ekinshi hám Respublikalıq sud-medicinalıq ekspertiza ilimiy-ámeliy orayı Qaraqalpaqstan filialı xızmetkeri Damir Qalimbetov úshinshi orınlardı jeńip aldı. Mini-futbol boyınsha ótkerilgen oyınlarda bolsa, Shımbay rayonı medicina birlespesi bas sıylıqtı jeńip aldı.
Finalda shımbaylılarǵa jeńilip qalǵan Kegeyli rayonı medicina birlespesi ekinshi, Shomanay rayonı medicina birlespesi sıylı úshinshi orınlarǵa ılayıq dep tabıldı. Spartakiada juwmaǵında jeńimpazlar shólkemlestiriwshiler tárepinen tayarlanǵan Húrmet jarlıqları, medalları hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı.