Kadastr agentligi Qaraqalpaqstan Respublikası basqarması tárepinen jerlerdi ózbasımshalıq penen iyelew xám hújjetsiz imarat qurıw jaǵdayların anıqlaw boyınsha bıyılǵı jıldıń 9 ayı dawamında 3271 jaǵdayda 283,7 gektar jer orınları ózbasımshalıq penen iyelengeni anıqlanǵan. Sonnan, 1974 gektarda 147,8 jaǵday saplastırılıp, 1208 jaǵday (119,2 gektar) boyınsha sud uyımlarına dawa arzası kirgizilgen hám 68 jaǵday (5,7 gektar) boyınsha hújjetler prokuratura uyımlarına jiberilgen.
– 2025-jıldıń ótken 9 ayı dawamında Mámleketlik kadastrlar palatası Qaraqalpaqstan Respublikası basqarması jáne onıń aymaqlıq filiallarına kóshpes múlkke kadastr pasport rásmiylestiriw ushın 69 mıń 177 arza kelip túsip, sonnan, 40 mıń 468 jer uchastkası hám kóshpes múlkke kadastr pasportı tayarlap berildi, – deydi usı basqarmanıń bas qánigesi P.Ájimuratov.
Kadastr hújjetlerin tayarlaw boyınsha eń kóp múrájat Nókis qalası turǵınlarınan kelip túsken.
Sonday-aq, Tórtkúl rayonında kadastr hújjetlerin qáwipsiz xám sapalı saqlaw maqsetinde 25 dana mobil stelajlar ornatılǵan bolıp 2025-jıldıń rejesine bola, Beruniy, Ellikqala rayonları filiallarınıń arxiv xanalarına da mobil stelaj ornatıw rejelestirilmekte.
Isbilermenlik hám qala qurılısı jumısların ámelge asırıw ushın jer uchastkaların múlk huqıqı hám ijara huqıqı tiykarında elektron onlayn-aukcion arqalı beriw boyınsha, jámi 4398 jer uchastkacı baǵdarlamaǵa kirgizilgen.
Sonnan, jámi 223,32 gektarlıq 2215 jer uchastkası “E-auksion” sawda maydanshasında satıwǵa qoyılıp, 161 jer uchastkası realizaciyalanǵan.
Jeke tártipte turaq jay qurıw hám turaq jayın abadanlastırıw ushın jer uchastkaların múlk huqıqı tiykarında elektron onlayn-aukcion arqalı realizaciyalaw boyınsha, jámi 1976 jer uchastkası baǵdarlamaǵa kirgizilgen.
Sonnan, 991 uchastka aukcionda satıwǵa shıǵarılǵan, 154 jer uchastkası “E-auksion” da realizaciyalanǵan.
Kóshpes múlkke bolǵan huqıqlardı mámleketlik dizimnen ótkeriw maqsetinde Mámleketlik kadastrları palatası Qaraqalpaqstan Respublikası basqarmasına yuridikalıq hám fizikalıq táreplerden 9 ay dawamında 95 mıń 383 arza kelip túsip, sonnan 64 mıń 132 arzaǵa tiykarlanıp múlkke bolǵan huqıqlar mámleketlik dizimnen ótkerilgen.
Bul baǵdardaǵı jumıslar nátiyjeli dawam etpekte.

Á.Jiyemuratov,
Qaraqalpaqstan xabar agentligi