Awıl xojalıǵı ministrligi baspasóz xızmeti Ellikqala rayonı hákimliginiń baspasóz xızmeti menen birgelikte usı rayondaǵı “Bostan” klasteri hám “Amirobod jayroni” innovaciyalıq paxta-ǵálle klasterleriniń jumısı menen jaqınnan tanıstırıw maqsetinde ǵalaba xabar qurallarınıń wákilleri ushın press-tur shólkemlestirdi.

Ilaj dawamında jurnalistler dáslep “Bostan” klasteri JShJ paxta tazalaw zavodınıń jumısları hám óndiris processleri menen tanıstı.
Házirgi waqıtta elimizdiń awıl xojalıǵında eń juwapkershilikli dáwir – paxta zúrááti jıyın-terimi máwsimi ótpekte. Usı múnásibet penen ótkerilgen press-tur dawamında ǴXQ wákilleri rayonıń ekonomikalıq júregi esaplanǵan “Bostan” klasteri JShJ jumısların hár tárepleme úyrendi.
“Bostan” klasteri paxtanı jetistiriwden baslap, onı tazalaw, jip, gezleme hám tayar kiyim-kenshek tigiwge shekemgi tolıq óndiris shınjırına iye. Jurnalistler klasterdiń talshıq tayarlaw cexları hám zamanagóy tigiw mashinaları menen úskenelengen tigiwshilik fabrikasında bolıp, hár túrli sapalı ónimler tayarlanıp atırǵan processti baqladı.
Media-turdıń gezektegi mánzili “Amirobod jayroni” innovaciyalıq paxta-ǵálle tuqımgershilik klasteri boldı. Jurnalistler bul jerde tuqımgershilik baǵdarına ilimiy qatnas, sapa qadaǵalaw sisteması hám zamanagóy agrotexnologiyalardıń qollanılıwın kórdi.
Ilaj dawamında jurnalistler ózlerin qızıqtırǵan sorawlarǵa juwap aldı.

Qaraqalpaqstan xabar agentligi