HAMAS Izraillı girewdegilerdi azat etedi, Izrail Qurallı kúshleri bolsa kelisilgen aymaqqa sheginedi. Tınıshlıq kelisiminiń bul birinshi basqıshın HAMAS hám Izrail wákilleri maqulladı. Bul haqqında AQSh Prezidenti Donald Tramp tómendegishe bayanat berdi:

– Bul neni ańlatadı? Barlıq girewdegiler tez arada azat etiledi, Izrail armiyasın kelisilgen sızıqqa shekem alıp ketedi. Turaqlı, isenimli hám máńgi tınıshlıqqa qaray dáslepki qádem taslandı. Barlıq táreplerge ádil múnásibette bolınadı.
Ol óz bayanatında Qatar, Egipet hám Túrkiya sıyaqlı mediatorlarǵa AQSh penen birgelikte bul “tariyxıy waqıya”ǵa erisilgeni ushın minnetdarshılıq bildirdi.
Tramp Aq úydegi baspasóz konferenciyasında kelisimge qol qoyıw procesinde qatnasıw ushın Jaqın Shıǵısqa baratuǵının málim etken. Gaza boyınsha kelisimdi Izrail, HAMAS hám Qatar wákilleri de tastıyıqlaǵan. Bas ministr Binyamin Netanyaxu sociallıq tarmaq arqalı 9-oktyabr kúni húkimet májilisin shaqırıp, uslap turılǵan tutqınlardı watanına qaytarıw hám kelisimdi ratifikaciyalaw niyetin bildirdi.
“Reuters” agentliginiń xabar beriwinshe, HAMAS ta Izrail menen kelisim dúzilgenin tasıyıqlaǵan. Qatar Sırtqı isler ministrliginiń rásmiy wákili Majid Al-Ansoriy soicallıq tarmaqta usınday dep jazdı:
– Mediatorlar búgin keshte Gazada oq atıwdı toqtatıw boyınsha kelisim shárti hám orınlaw mexanizmi boyınsha kelisimdi járiyalaydı. Bul urıstı toqtatıw, izraillı girewdegiler hám palestinalı tutqınlardı azat etiw jáne gumanitarlıq járdem jetkeriw imkaniyatın beredi.
BMSh Bas xatkeri Antoniu Guterrish sociallıq tarmaqta Izrail hám XAMAS arasındaǵı kelisimdi qollap-quwatlap, Jaqın Shıǵısta tınıshlıqqa qaray qádem taslanǵanın tán aldı:
– Mápdar táreplerdi belgilengen shártke qatań ámel etiwge shaqıramız. Barlıq girewdegiler azat etiliwi kerek. Tiykarǵı maqset – oq atıwdı pútkilley toqtatıw. Áskeriy háreketti tamamlaw. BMSh kelisimniń orınlanıwın qollap-quwatlaydı, Gaza sektorına gumanitarlıq járdem jetkerip beriw kólemin arttıradı. Sonıń menen birge, házirdiń ózinde hesh qanday tosqınlıqsız gumanitarlıq júk, zárúr kommerciyalıq ónimler alıp kiriliwin támiyinlew kerek. Pursattan paydalanıp, Palestina xalqınıń óz táǵdirine iyelik etiw huqıqın tán alatuǵın, isenimli siyasiy sheshim, yaǵnıy eki mámleketlik joldı belgilew zárúr. Sonda ǵana izraillılar hám palestinlılar tınısh, qáwipsiz turmıs keshiredi.

Kenja Bekjonov, Anvarxwja Ahmedov, ÓzA