Elimizde mámleketlik uyımlar hám shólkemlerde, jergilikli atqarıwshı uyımlarda korrupciya illetine qarsı gúresiw máselesine ayrıqsha itibar qaratıp kelinbekte.

Bıyılǵı jıldıń 19-sentyabrinde Ózbekstan Respublikası Prezidentiniń «Korrupciyaǵa qarsı gúresiw tarawında puqaralıq jámiyeti institutlarınıń qatnasın jáne de keńeytiw hám ilimiy izertlewlerdi qollap-quwatlaw ilajları haqqında»ǵı qararı qabıl etildi. Oǵan bola, korrupciyalıq qáwiplerdi anıqlaw, bahalaw hám olardı azaytıw boyınsha ilajlar ámelge asırılmaqta.
Ózbekstan mámleketlik denetárbiyası hám sport universiteti Nókis filialında usı máselege baǵıshlanǵan ilaj bolıp ótti. Oǵan Qaraqalpaqstan Respublikası Ádillik ministrliginen, prokuraturasınan, Ishki isler ministrliginen qánigeler, filialdıń professor-oqıtıwshıları hám student-jaslar qatnastı.
– Filialımızdaǵı xızmetkerlerdiń huqıqıy bilimin, korrupciyaǵa qarsı immunitetin arttırıwǵa qaratılǵan ilajlardı ótkeriw, sistemada jámiyetlik qadaǵalawdı kúsheytiw maqsetinde, huqıq qorǵaw uyımlarınıń wákilleri qatnasıwında «Biz korrupciyaǵa qarsımız», «Biziń filialda korrupciyaǵa orın joq», «Korrupciyaǵa birgelikte gúresemiz» sıyaqlı temalarda dógerek sáwbetleri hám ushırasıwlar shólkemlestirilmekte, – deydi filial direktorı B.Erimbetov. – Búgingi kúni studentlerdiń bilimin qadaǵalaw hám bahalaw processleriniń ashıq-aydın ámelge asırılıwın támiyinlew maqsetinde imtixanlarǵa turaqlı túrde jámiyetshilik wákilleri tartılıp, imtixan nátiyjeleri onlayn túrde járiyalanıwı jolǵa qoyılmaqta.
Sonday-aq, ilajda filial professor-oqıtıwshıları hám student-jaslarǵa korrupciyalıq jaǵdaylardıń gúwası bolǵanda qay jerge múrájat etiw kerekligi, isenim nomerleri, maǵlıwmat bergen shaxstıń sır saqlanıwı kepillenetuǵını haqqında tolıq maǵlıwmatlar berildi. Qatnasıwshılar bul baǵdarda ózlerin qızıqtırǵan sorawlarına tiyisli taraw qánigelerinen juwap aldı.

Qaraqalpaqstan xabar agentligi.