Birlesken Milletler Shólkeminiń Bas xatkeri Antoniu Guterrish Izrail hám HAMAS arasındaǵı tınıshlıq kelisimin qollap-quwatlap, shólkem táreplerdi qollap-quwatlaw hám gumanitarlıq járdemdi kóbeytiwge tayar ekenin bildirdi.

Aldınıraq AQSh Prezidenti Donald Tramp tiyisli rejeniń birinshi basqıshın ámelge asırıw niyetine erisilgenin málim etken edi. Kelisimge bola, Palestina háreketi girewge alınǵanlardı azat etedi, Izrail bolsa áskerlerin aymaqtan tolıq alıp shıǵadı.
– Tramp tárepinen alǵa qoyılǵan usınıs tiykarında Gazada oq atıwdı toqtatıw hám girewge alınǵanlardı azat etiw boyınsha kelisim járiyalanıwın qollap-quwatlayman, – dedi Guterrish. – BMSh kelisim shártiniń tolıq orınlanıwı, gumanitarlıq járdem kóbeytiliwi hám Gazanı qayta qurıw baslanıwın qollap-quwatlaydı. Barlıq mápdar táreplerdi basqınshılıqtı saplastırıw, Palestina xalqınıń óz táǵdirin ózi belgilew huqıqın tán alıw, izraillı hám palestinalılarǵa tınısh, qáwipsiz jasaw imkaniyatın beretuǵın eki mámleket sheshimine erisiw jolında isenimli siyasiy sistema jaratıw ushın bul imkaniyattan paydalanıwǵa shaqıraman. Bul boyınsha mápler hár qashanǵıdan da joqarı.

S.Rahimov, ÓzA