Berdaq atındaǵı Qaraqalpaq ádebiyatı tariyxı mámleketlik muzeyinde Qaraqalpaqstan Respublikasına miyneti sińgen kórkem óner ǵayratkeri, Ózbekstan hám Qaraqalpaqstan Respublikalarınıń xalıq bilimlendiriw aǵlası, ustaz Abadan Saparovanıń 80 jıllıq yubileyi múnásibeti menen ádebiy saz-sáwbetli keshe bolıp ótti. Onda jazıwshı-shayırlar, mádeniyat hám kórkem óner tarawı wákilleri, shańaraq aǵzaları hám shákirtleri qatnastı.

Keshede yubiley múnásibeti menen Qaraqalpaqstan Respublikası Joqarǵı Keńesi komitet baslıǵı M.Atamuratov hám Ministrler Keńesiniń Turizm, mádeniyat, mádeniy miyras hám ǵalaba kommunikaciyalar máseleleri boyınsha sekretariat baslıǵı Z.Ómirbekov Qaraqalpaqstan Respublikası Joqarǵı Keńesi hám Ministrler Keńesiniń atınan qutlıqlawlardı tapsırdı. Keshe dawamında Ózbekstan hám Qaraqalpaqstan Respublikaları kórkem óner ǵayratkerleri, kompozitorlar, Qaraqalpaqstan xalıq shayırları, uyımlardıń, fond hám teatrlardıń basshıları shıǵıp sóylep, ustazdıń dóretiwshilik miynetlerine joqarı baha berdi.
Qaraqalpaq xalqınıń tuńǵısh hayal skripkashısı, dáslepki hayal kompozitor A.Saparova 50 den aslam qosıqqa muzıka jazdı. Onıń Sh. Mámbetmuratovtıń sózine jazılǵan «Pal hárresi yańlı izledim seni», S.Dáwletalievtıń sózine jazılǵan «Ushırasıw» sıyaqlı namaları xalqımızdıń súyikli qosıqlarına aylandı. Sonıń menen birge, «Qızlarımdı qızǵanaman», «Qayıl ana», «Shıpakerler» sıyaqlı qosıqları xalıq arasında keńnen tanıldı.
Uzaq jıllar dawamında A.Saparova muzıka tarawında ustazlıq hám dóretiwshilik xızmet atqardı. Ol Nókis muzıka mektebi hám bir neshe mádeniy mákemelerdiń basshısı, Qaraqalpaqstan kompozitorlar awqamınıń juwaplı xatkeri bolıp isledi. 2001-jıldan baslap Ózbekstan Respublikası «Altın miyras» qorınıń Qaraqalpaqstan bólimin basqarıp kelmekte.
1994-jılı Almata qalasında ótkerilgen «Túrkiy tilles xalıqlardıń muzıkaları» xalıqaralıq simpoziumǵa basshılıq etti. 1997-jılı Germaniyanıń Bonn, Myunxen, Keln, Frankfurt qalalarında ótkerilgen konferenciyalar menen festivallarda xalqımızdıń bay folklorın, jırawlıq dástúrin sırt ellerge tanıstırdı.
Ilajda A.Saparovaǵa Qaraqalpaqstan Respublikası Joqarǵı Keńesi komitet baslıǵı Murat Atamuratov milliy mádeniy miyrasımızdı qásterlep saqlaw, úgit-násiyatlaw jolındaǵı nátiyjeli miynetleri ushın «Altın miyras» xalıqaralıq qayırqomlıq jámiyetlik fondınınıń «Oltin meros» medalın saltanatlı túrde tapsırdı.
Ilaj dawamında A.Saparovanıń namalarına jazılǵan qosıqlar Ózbekstan, Qaraqalpaqstan, Tatarstan xalıq artisti T.Doshumova, Ózbekstan hám Qaraqalpaqstan xalıq artisti M.Sapaeva, R.Qutekeeva hám basqalar atqarıwında qatnasıwshılardıń itibarına usınıldı.
Sonday-aq, Xojeli rayonı 32-sanlı ulıwma orta bilim beriw mektebiniń oqıwshıları tayarlap kelgen qosıq qatarları, muzıka mektepleriniń jas baqsı jigit-qızlarınıń duwtar sazları kesheniń jáne de kóterińki ruwxta ótiwin támiyinledi.

Qaraqalpaqstan xabar agentligi