Ózbekstan Respublikası Prezidenti Shavkat Mirziyoevtiń Birlesken Milletler Shólkemi Bas Assambleyasınıń 80-sessiyasındaǵı shıǵıp sóylegen sózinen alınǵan.

Prezident Shavkat Mirziyoev: Mámleketler arasında sanlı rawajlanıw hám jasalma intellektten paydalanıwda teńsizliktiń aldın alıw oǵada áhmiyetli. Densawlıqtı saqlaw, bilimlendiriw hám mádeniyat tarawlarında jasalma intellekttiń ámeliy sheshimleri hám modellerin biyǵárez almasıwǵa qaratılǵan Xalıqaralıq birge islesiw mexanizmin jaratıwdı usınıs etemiz.
Maǵlıwmat ornında aytıw kerek, 2024-jıl 30-avgustta Prezident pármanı menen “Jasalma intellekt texnologiyaların 2030-jılǵa shekem rawajlandırıw strategiyası” tastıyıqlandı. Bul hújjet sociallıq taraw hám ekonomika tarmaqlarında jasalma intellekt texnologiyaların keńnen engiziw ushın huqıqıy, texnologiyalıq hám ekonomikalıq sharayatlardı jaratıwdı názerde tutadı.
Prezident qararına muwapıq, 2025-jıldan baslap Ózbekstan ulıwma bilim beriw mektepleriniń joqarı klasslarında “Jasalma intellekt” páni óz aldına pán sıpatında oqıtıladı. Bul baǵdarlama Jańa Ózbekstan universiteti hám Massachuset texnologiya institutı qánigeleri menen birgelikte islep shıǵılǵan.
Bunnan tısqarı, UNICEF penen birgelikte “Eduten” sanlı platforması sınaqtan ótkerildi. Nátiyjede oqıwshılardıń matematika pánindegi kórsetkishleri 16,9 procentke artqanı atap ótilgen.
Densawlıqtı saqlawda da bir qatar baslamalar ámelge asırılmaqta. Sonıń ishinde, elektron recept sisteması iske qosılıp, dárilerdiń markirovkası, olardı qadaǵalaw hám nawqaslarǵa qolaylıq jaratıw jolǵa qoyıldı. Sonday-aq, jasalma intellekt tiykarında diagnoz qoyıw hám medicinalıq maǵlıwmatlardı tallaw joybarları sınaqtan ótkerilmekte.
Jasalma intellekt tarawındaǵı ishki reformalar menen bir qatarda, Ózbekstan xalıqaralıq birge islesiwdi de keńeytpekte. 2025-jıl 29-may kúni Ózbekstan hám Qazaqstan balalar rak keselligin úyreniw boyınsha xalıqaralıq akademiyalıq oray shólkemlestiriwge kelisip aldı. Bul oray diagnostika, ilimiy izertlewler hám tájiriybe almasıw boyınsha áhmiyetli birge islesiw platformasına aylanıwı kútilmekte.
Xalıqaralıq sherikliktiń jáne bir baǵdarı Yaponiya menen baylanıslı. Atap aytqanda, JICA (Yaponiya xalıqaralıq birge islesiw agentligi) menen bilimlendiriw, densawlıqtı saqlaw, insan resursların rawajlandırıw, qánigelesken medicinalıq oraylar hám kásip-óner bilimlendiriwi sıyaqlı tarawlarda birgeliktegi joybarlar ámelge asırılmaqta.

ÓzA