Paytaxtımızda jaylasqan Gimnastika boyınsha respublikalıq qánigelestirilgen olimpiada rezervleri balalar-jas óspirimler sport mektebinde kikboksing boyınsha jáhán kubogi baslandı.

Elimizde sporttı rawajlandırıwǵa qaratılıp atırǵan ayrıqsha itibardıń nátiyjesinde dúnyanıń abıraylı jarıslarında Watanımız bayraǵın bálent kóterip atırǵan sportshılarımızdıń qatarı kún sayın keńeyip, mámleketimiz kóplegen iri sport ánjumanlarına basshılıq etpekte.
Sonıń ishinde, Ózbekstanda sporttıń barlıq túrleri qatarında kikboksingti de rawajlandırıwǵa qaratılıp atırǵan turaqlı itibar, hár qıylı abıraylı ánjumanlardı shólkemlestiriwdegi bay tájiriybe hám jaratılǵan keń imkaniyatlar esapqa alınıp, Pútkil jer júzilik kikboksing shólkemleri associaciyası (WAKO) tárepinen jáhán kubogine basshılıq etiw huqıqı ekinshi márte Tashkent qalasına berildi.
Gimnastika boyınsha respublikalıq qánigelestirilgen olimpiada rezervleri balalar-jas óspirimler sport mektebinde 8-oktyabr kúni jáhán kuboginiń ashılıw máresimi bolıp ótti.
Bayramǵa tán bezelgen sport kompleksi miymanlar, sportshı hám trenerler, ıqlasbentler menen tolı boldı. Ózbekstan Respublikası Mámleketlik gimni jańladı.
Pútkil jer júzilik kikboksing shólkemleri associaciyası (WAKO), Ózbekstan sport ministrligi, mámleketimiz kikboksing associaciyası tárepinen bir qatar ministrlikler hám shólkemler menen birgelikte shólkemlestirilgen bul jáhán kuboginde 40 mámlekettiń 2311 den aslam kikboksing sheberleri sıylı orınlar ushın gúresedi.

Javohir Toshxwjaev,
Almurod Mamadaminov (surat), ÓzA