Huqıqıy múnásibet
Jol-patrul xızmeti xızmetkerleriniń tosattan toqtawǵa belgi bergen háreketin kórip, qaysı qaǵıydanı buzǵan ekenmen, dep oylaymız.
Al, olar tiykarınan qaysı jaǵdaylarda avtomobildi toqtatıw huqıqına iye?
Bul haqqında Tashkent mámleketlik yuridikalıq universiteti oqıtıwshısı Javohir Eshonqulov tómendegishe túsinik berdi:
– JPX xızmetkeri tárepinen transport quralları tómendegi tiykarlar boyınsha toqtatılıwı múmkin. Sonıń ishinde, aydawshı tárepinen jol háreketi qaǵıydalarınıń buzılıwı vizual baqlawda anıqlanǵanda yamasa arnawlı qurılma járdeminde dizimge alınǵanda, transport quralı, aydawshı yamasa jolawshı izlewde ekenligi, jol transport hádiysesi yamasa basqa da huqıqbuzarlıqqa baylanıslı ekenligi haqqında maǵlıwmatlar bar bolǵanda toqtatıwı múmkin.
Jol transport hádiysesi, huqıqbuzarlıq júz bergenin kórgen aydawshı yamasa jolawshıdan hádiyse tárepin anıqlastırıw zárúrligi júzege kelgende yamasa wákillikli mámleketlik uyımlar yamasa lawazımlı shaxslardıń háreketti sheklew yamasa qadaǵan etiw boyınsha kórsetpelerin orınlaw procesinde de transport quralı toqtatılıwı múmkin.
Transport quralınan nızam hújjetlerinde belgilengen tártipte paydalanıw zárúrligi júzege kelgende, sonıń ishinde, sırt mámleketlerdiń diplomatiyalıq, konsullıq wákilxanalarına hám basqa da wákilxanalarına, xalıqaralıq shólkemlerge tiyisli bolǵan transport quralları hám arnawlı mólsherlengen transport quralları buǵan kirmeydi.
Sonday-aq, arnawlı ilajlardı ótkeriw procesinde transport quralınan paydalanıw hám basqarıw huqıqın beretuǵın, transport quralı hám alıp shıǵılıp atırǵan júklerge baylanıslı hújjetlerdiń bar ekenligin tekseriw ushın arnawlı hám áskeriy júkler, bajıxana rásmiylestiriwinen ótkerilip, bajıxana xızmeti tárepinen plombalanǵan júkler de buǵan kirmeydi.
JPX xızmetkeri tárepinen basqa tiykarlar boyınsha transport quralların toqtatıw qadaǵan etiledi.
Tiykar: Jol-patrul xızmeti xızmetkerleriniń jol háreketi qatnasıwshıları menen óz-ara qatnasıqları hám arnawlı qurallardan paydalanıw tártibi haqqındaǵı rejeniń 6-bánti.

ÓzA