Búgingi texnologiya rawajlanǵan zamanda kitapqa múnásibet te hár qıylı. Sociallıq tarmaqlardıń tiykarǵı quralı bolǵan qısqa videorolikler adamlarda asıǵıslıq, qızbalıq sıyaqlı zıyanlı illetlerdiń qáliplesiwine alıp kelip atırǵanı ashınarlı jaǵday, álbette.
Sonıń menen birge, turaqlı túrde telefonnan paydalanatuǵınlardıń kóriw imkaniyatları keskin jamanlasıp atırǵanı da bar gáp.
Mine, usınday jaǵdaylarda kitapqumarlar kitap oqıw ushın túrli qolaylıqlarǵa mútájlik seziwi tábiyǵıy. Sonı esapqa alǵan halda audiokitaplardıń sanı artıp barmaqta. Tek ǵana ózbek emes, al dúnya ádebiyatınıń eń dúrdana shıǵarmaları da dawıslandırılıp atırǵanı quwanıshlı jaǵday. Eń áhmiyetlisi, zamanagóy ádebiy processten de úzilis bolmay atır. Kitapqumarlar massası tárepinen jıllı kútip alınǵan shıǵarmalar tez dawıslandırılmaqta.
Bir nárseni ayrıqsha atap ótiw kerek. Kóriw imkaniyatı sheklengen kitapqumarlar, studentler ushın da ilimiy-kórkem ádebiyatlardıń audio formatı jaratılmaqta. Bunıń ushın hár qıylı joybarlar islep shıǵılıp, kóplegen mámleketlik shólkemler, atap aytqanda, Ózbekstan Jaslar isleri agentligi tárepinen qarjılandırılmaqta.
Kórinip turǵanınday, jámiyetimizde audio kontent jaratıwǵa bolǵan talap jeterli. Sonı esapqa alǵan halda ózine tán báseki de júzege kelmekte. Endi tıńlawshılar bir kitaptı bir neshe dawısta tıńlaw imkaniyatına iye bolmaqta. Bunıń ushın bir qansha sheber diktorlar tartılıp, sapa da artıp barmaqta.

Sherbek Islomov, ÓzA