Gúzgi jawın-shashın baslanıwı, hawa-rayınıń keskin suwıtıp ketiwiniń aldınan jazı boyı diyqanlarımızdıń tınımsız miyneti arqasında jetistirilgen paxtanı óz waqtında sepsitpey terip-jıynap alıw áhmiyetli bolmaqta. Bul jumıslar barısınıń nátiyjeli bolıwın támiyinlew, qadaǵalaw tiyisli juwapkerlerge júklengen. Qońırat rayonında da paxta terimi processleri úyrenildi.
Ózbekstan fermerleri keńesiniń bólim baslıǵı M.Muxammadiev, Qaraqalpaqstan fermerleri keńesi baslıǵınıń orınbasarı F.Bekanov hám basqa da juwapkerler tárepinen Qońırat rayonınıń ayırım aymaqlarında paxta jıynaw processleri úyrenildi.
Sapar dawamında olar Qańlı APJ aymaǵındaǵı “Shavir,” Ájiniyaz APJ aymaǵındaǵı “Kerimbaev Kewlimjay” hám “Djiyenbaev Kuandik” fermer xojalıqlarınıń paxta atızlarında bolıp, terim processleri menen jaqınnan tanıstı.
Paxtanı terip-jıynap alıw procesinde terimshiler ushın zárúr sharayatlar jaratılǵanı, miynetke haqı óz waqtında tólenip atırǵanı jáne ıssı awqat hám transport xızmeti menen támiyinlew jumısları kózden ótkerildi.
Sonday-aq, terimde belsene qatnasıp atırǵan aldınǵı terimshiler xoshametlendi. Juwapkerler bul xoshametlew tek ǵana terimshilerdi xoshametlew emes, al paxta zúráátin qısqa múddette sapalı jıynap alıwda da úlken áhmiyetke iye ekenin atap ótti.

Qaraqalpaqstan xabar agentligi