Balalarǵa itibar – keleshekke itibar. Shomanay rayonında da “Mehirli insanlar” fondı tárepinen balalar ushın qolaylıqlar jaratıldı.

Shomanay rayonlıq Medicina birlespesiniń balalar bóliminde “Mehirli insanlar” fondınıń baslaması menen, Birlesken Milletler Shólkemi Xalıqaralıq Hayal-qızlar gildiyasınıń grantı tiykarında balalar dem alıw bólmesi hám fizioterapiya xanalarında kishi ońlaw hám bezew jumısları ámelge asırıldı.
Sonday-aq, bul xanalarǵa zamanagóy ásbap-úskeneler, trenajyorlar hám hár qıylı oyınshıqlar alıp kelinip, balalar ushın jáne de qolaylı hám ıqsham sharayatlar jaratıldı.
Rayon hákimi A.Ametov emlewxananıń balalar bólimine barıp, ámelge asırılǵan jumıslar menen jaqınnan tanıstı hám “Mehirli insanlar” fondı wákillerine minnetdarshılıq bildirip, balalarǵa arnalǵan estelik sawǵaların tapsırdı.
Álbette, bunday iygilikli baslamalar emlewxanada emlenip atırǵan balalardıń keypiyatın kóterip ǵana qoymastan, al olardıń ishki dunyasına jıllılıq baǵıshlap, tezirek sawalıp ketiwi ushın pozitiv ortalıq jaratadı.

Qaraqalpaqstan xabar agentligi