Bas prokuratura janındaǵı Májbúriy orınlaw byurosı sisteması xızmetkerleri puqaralardıń máplerin támiyinlewge qaratılǵan ámeliy ilajlardı dawam ettirmekte.

Sud qararları hám basqa hújjetler orınlanıwı menen kúshli. Yaǵnıy hújjetlerdiń orınlanıwı támiyinlengen jaǵdayda ǵana puqaralar, yuridikalıq shaxslar hám mámleket payda kóredi.
MOB baspasóz xızmetiniń maǵlıwmatlarına qaraǵanda, byuronıń Nókis rayonlıq bólimi tárepinen is júrgiziwindegi mámleket paydasına óndiriwler menen baylanıslı orınlaw hújjetleriniń orınlanıwın támiyinlew baǵdarında bir qatar ilajlar ámelge asırıldı. Sonnan salıq qarızdarlıǵın óndiriw ayrıqsha qadaǵalawǵa alınǵan. Atap aytqanda, byuronıń Nókis rayonlıq bólimi tárepinen bólim is júrgiziwinde jámi 26 million 800 mıń sumlıq qarızdarlıǵı bolǵan, rayondaǵı «Aqmańǵıtlı qayshılı» fermer xojalıǵına tiyisli, awıl xojalıǵına mólsherlengen jer uchastkası bólimniń mámleketlik xızmetkerleri tárepinen xatlawǵa alınıp, elektron onlayn-aukcion sawdalarǵa shıǵarılǵan.
Ózbekstan Respublikası Prezidentiniń 2025-jıldıń 28-martındaǵı «Awıl xojalıǵında jerden paydalanıwdıń nátiyjeliligin arttırıw hám ónimdi jetistiriw kólemin kóbeytiw boyınsha qosımsha ilajlar haqqında»ǵı qararınıń 6-bántinde sud hújjetleri hám basqa uyımlardıń hújjetlerin orınlaw procesinde óndiriwshi qarızdardıń awıl xojalıǵına mólsherlengen jer uchastkasına uzaq múddetke ijaraǵa alıw huqıqına qaratılıwı belgilengen.
Bul qararǵa muwapıq sud hújjetleri hám basqa uyımlardıń hújjetlerin orınlawda óndiriwshi qarızdardıń awıl xojalıǵına mólsherlengen jer uchastkasın uzaq múddetke ijaraǵa alıw huqıqına qaratıw boyınsha ápiwayılastırılǵan tártip engizildi.
Usı jıldıń 30-sentyabr kúni ótkerilgen aukcion sawdalarında qarızdarǵa tiyisli awıl xojalıǵına mólsherlengen jer 130,4 million sumǵa satılıp, satıwdan túsken pullar qarızdardıń mámleketlik byudjet aldındaǵı qarızın qaplawǵa qaratıldı.

Qaraqalpaqstan xabar agentligi.