Búgingi kúnde paxta atızlarında terimshilerdiń pidákerlik miyneti, awızbirshilik hám kóterińki keypiyat húkim súrmekte.
Kegeyli rayonı Kók ózek awıl puqaralar jıyını aymaǵındaǵı “Ásir 21” fermer xojalıǵında da paxta jıyın terimi qızǵın túrde ámelge asırılmaqta.

Ol jerde ÓzLiDeP Qaraqalpaqstan Respublikası Keńesiniń jámááti, sonday-aq, Ózbekstan máhálleleri awqamı Qaraqalpaqstan Respublikası basqarmasınıń basshıları terimshilerge harmasın aytıp, olar menen birgelikte paxta terimi procesinde belsene qatnastı.
Partiya belsendileri terimshiler menen sáwbetlesip, olardıń jumısları menen jaqınnan tanıstı hám kúnlik qırmanǵa óz úlesin qostı. Bunday ilajlar tek ǵana miynet procesin qollap-quwatlaw emes, al xalıq arasında bolıw, miynetkeshlerge ruwxıy kúsh baǵıshlaw maqsetin gózleydi.
Kún juwmaǵında eń aldınǵı terimshiler estelik sawǵaları menen sıylıqlandı.
Ilajda qatnasqanlar miynetkesh insanlarǵa bolǵan húrmet hám itibar arqalı jámiyetlik awızbirshilik hám tatıwlıq ortalıǵı jáne de bekkemlenip atırǵanın atap ótti.

Qaraqalpaqstan xabar agentligi