Nókis rayonındaǵı “Doslıq-1” suw bólistiriw obektinde suw xojalıǵı sisteması shólkemlerine jańa ekskavatorlar hám suwshılarǵa skuterlerdi tapsırıwǵa baǵıshlanǵan ilaj bolıp ótti.

Ilajda Qaraqalpaqstan Respublikası Ministrler Keńesiniń Baslıǵı F.Ermanov, Ózbekstan Respublikası Prezidenti Administraciyası basshısınıń orınbasarı T.Butunbaevlar shıǵıp sóylep, sońǵı jılları Prezidentimizdiń basshılıǵında suw xojalıǵı sistemasında alıp barılıp atırǵan reformalar hám olardıń orınlardaǵı nátiyjeleri haqqında pikir bildirdi.
Atap ótilgenindey, sońǵı jılları Prezidentimiz hám Húkimetimizdiń suw xojalıǵı sistemasınıń jumısına baylanıslı kóplegen párman hám qararları, sonıń ishinde, Qaraqalpaqstan Respublikası ushın ayrıqsha qararlar qabıl etildi hám olar tiykarında orınlarda keń kólemli jumıslar ámelge asırıldı.
Atap aytqanda, Ózbekstan Respublikası Prezidentiniń 2024-jıl 5-yanvardaǵı tiyisli qararına tiykarlanıp, usı jıldıń ózinde Qaraqalpaqstan Respublikası rayonlarındaǵı “Suw jetkerip beriw xızmeti” mámleketlik mákemelerine jámi 9 dana ekskavator alıp kelindi. Bul baǵdardaǵı jumıslar izbe-iz dawam ettirilip, sistema shólkemlerine zárúr texnikalar hám suwshılar ushın skuterler alıp berilip, olardıń jumıs nátiyjeliligin arttırıw boyınsha sistemalı jumıslar alıp barılmaqta.
Bunnan soń, 5 rayonlıq “Suw jetkerip beriw xızmeti” mámleketlik mákemelerine jańa ekskavatorlar hám suw xojalıǵı sisteması shólkemlerinde isleytuǵın 55 xızmetkerge skuterlerdiń giltleri saltanatlı túrde tapsırıldı.
Ilajda veteran suwshılar, jańa texnika hám skuterler tapsırılǵan xızmetkerler de shıǵıp sóylep, Prezidentimizge, respublika basshılıǵına hám Suw xojalıǵı ministrligine kórsetilip atırǵan itibar ushın minnetdarshılıq bildirdi.

Qaraqalpaqstan xabar agentligi