Belgili mámleketlik hám jámiyetlik ǵayratker, Ózbekstan Respublikası suw xojalıǵı ministriniń keńesgóyi Ismoil Jwrabekov bıyıl 28-sentyabr kúni qaytıs bolǵan edi.

Prezident Shavkat Mirziyoev búgin aza tutqan shańaraqqa bardı. Quran oqılıp, duwa etildi.
Mámleketimiz basshısı marhumnıń iygilikli islerin, Watanımızǵa xızmetlerin eske aldı.
Ismoil Jwrabekov 1931-jıl 12-sentyabrde Samarqand qalasında jumısshı shańaraǵında tuwılǵan. Miynet jolı dawamında suw xojalıǵı tarawında juwapker lawazımlarda miynet etip, respublikamızda irrigaciya hám melioraciya tarawın rawajlandırıwǵa múnásip úles qostı. 1985-jılı Ózbekstan Ministrler Keńesi baslıǵınıń birinshi orınbasarı etip tayınlandı.
Ǵárezsizlik jıllarında I.Jwrabekov Ózbekstan Respublikası Bas ministriniń birinshi orınbasarı, Mámleketlik suw qadaǵalawınıń baslıǵı, Ózbekstan Respublikası Prezidentiniń Mámleketlik keńesgóyi lawazımlarında da nátiyjeli jumıs alıp bardı.
Sońǵı jılları I.Jwrabekov teberik jasta bolıwına qaramastan, suw xojalıǵı ministriniń másláhátshisi sıpatında xızmet etip, Jańa Ózbekstandı qurıwǵa qaratılǵan keń kólemli reformalardı ámelge asırıwǵa belsene qatnastı.
Mámleketlik hám jámiyetlik ǵayratkerdiń xalqımız hám Watanımız aldındaǵı xızmetleri múnásip bahalanıp, ol “Ózbekstan Respublikasına xızmet kórsetken irrigator” húrmetli ataǵı hám mámleketimizdiń bir qatar joqarı sıylıqları menen sıylıqlanǵan edi.
Mámleketimiz basshısı marhumnıń perzentleri hám jaqınlarına kewil aytıp, sabır tiledi. Olar Prezidentimizge kelgeni hám kewil bildirgeni ushın minnetdarshılıq bildirdi.

ÓzA